اقتصاد وزارت په یوه خبرپاڼه کې ویلي، چې د دې وزارت وزیر قاري دینمحمد حنیف په افغانستان کې د هند له شارژدافیر یتین پټیل سره په لیدنه کې د دواړو هېوادونو ترمنځ د اقتصادي او پراختیايي همکاریو پر پراختیا، په ځانګړي ډول د نیمګړو پراختیايي پروژو د بیا پیل او بشپړولو په اړه خبرې کړي.
د اقتصاد وزیر د افغانستان د پراختیا په برخه کې د هند د همکاریو اهمیت ته په اشارې، د HICDP پروګرام د بیا پیل پر اړتیا ټینګار کړی او ویلي یې دي، چې دغه پروګرام د خلکو د ژوند د شرایطو د ښه والي، د بنسټیزو زیربناوو د پیاوړتیا او د افغانستان د دوامدارې پراختیا د ملاتړ په موخه د هند له لوري تمویلېده او د نیمګړو پروژو د بشپړولو لپاره یې د لا زیاتو همکاریو او همغږۍ غوښتنه کړې.
خبرپاڼه زیاتوي، چې د هند شارژدافیر یتین پټیل د افغانستان له خلکو سره د خپل هېواد د اقتصادي او پراختیايي همکاریو د دوام ډاډ ورکړی او ویلي یې دي، چې د نیمګړو پروژو د بشپړولو او د بشپړو شویو پروژو د لګښتونو د انتقال د ستونزې په اړه یې په هند کې له اړوندو ادارو سره د اقتصاد وزارت د پروژو د اسنادو د ارزونې او موندنو پر بنسټ لازمې همغږۍ ترسره کړې دي.