دایران صدا و سیما خبري اژانس خبر ورکړی، چې د امریکا د بهرنیو چارو وزارت یوه پخواني چارواکي جیمز کارډن ویلي، د ایران پر ضد د امریکا جګړه نه د هرمز تنګي د سمندري لارو له خوندیتوب سره تړاو درلود او نه هم د ایران د اټومي وسلو د جوړولو له ادعاوو سره، بلکې اصلي لامل یې د هغو سیمهییزو ډلو ملاتړ و، چې د اسرائیلو د پراختیا غوښتونکو سیاستونو پر وړاندې ولاړې دي.
جیمز کارډن، چې د امریکا د بهرنیو چارو وزارت پخوانی چارواکی دی، ویلي چې د ایران پر ضد د امریکا پوځي اقدامات د هرمز تنګي د کښتۍ چلونې له لارو او یا هم د ایران د اټومي وسلو د جوړولو له موضوع سره هېڅ تړاو نه درلود.
هغه د رسنیو له لارې په خپلو څرګندونو کې ویلي، هغه ادعا چې ګواکې ایران د اټومي وسلو د جوړولو په درشل کې و او ښايي د اسرائیلو پر ضد یې وکاروي، «بېبنسټه او له حقیقته لرې» ده.
کارډن زیاته کړې، چې د جګړې تر شا اصلي لامل د ایران له لوري د هغو سیمهییزو متحدینو ملاتړ و، چې د اسرائیلو د پراختیا غوښتنې او سیمهییزو سیاستونو پر وړاندې دریځ لري.
نوموړي د امریکا د ولسمشر ډونالډ ټرمپ هغو څرګندونو ته هم اشاره کړې، چې ویلي یې وو ایران باید هېڅکله اټومي وسلو ته لاسرسی پیدا نه کړي. د کارډن په وینا، ایران اساساً د اټومي وسلو د ترلاسه کولو په لاره کې نه و او د دې ادعا لپاره کافي شواهد نه موجود وو.
هغه همداراز یادونه یې کړې، چې ایران د خپل مذهبي او سیاسي مشرتابه د فتواوو له امله د اټومي وسلو د تولید او کارونې مخالف دریځ خپل کړی او له همدې امله یې د دغو وسلو د جوړولو هڅه نه کوله.