د امنيتي او تصفيوي چارو مرکزي کمېسيون په یوه خبرپاڼه کې ویلي دي، چې د دې کمېسیون نوبتي غونډه د ياد کمېسيون د مسؤول او د دفاع وزير، مولوي محمد يعقوب مجاهد، په مشرۍ ترسره شوې ده.
د خبرپاڼې د معلوماتو له مخې، په دې غونډه کې د هېواد د امنيتي وضعيت هر اړخيزه ارزونه شوې او د امنيت د لا ټينګښت لپاره پر بېلابېلو امنيتي موضوعاتو مفصل بحثونه شوي دي.
د کمېسيون مشرتابه د هېوادوالو لپاره د ډاډمن او سرتاسري امنيت پر ټينګښت ټينګار کړی او اړوندو ادارو ته يې د امنيتي چارو د لا ښه تنظيم او همغږۍ سپارښتنې کړې دي.
خبرپاڼه زیاتوي، چې د ولايتي کمېسيونونو وړانديزونه د ارزونې ترڅنګ، د امنيتي چارو د لا پياوړتيا او اغېزمنتيا په موخه یې اړينې پرېکړې او سپارښتنې کړې دي.