د امریکا ولسمشر ډونالډ ټرمپ ویلي، د امریکا پوځي بریدونه به د راتلونکو درېیو شپو لپاره دوام وکړي او که تهران له واشنګټن سره د خبرو اترو له بهیره انکار وکړي، نو راتلونکې اونۍ به د ایران د برېښنا فابریکې، پلونه او د انرژۍ مهمې زېربناوې په نښه شي.
ټرمپ دا څرګندونې په داسې حال کې کړي، چې د راپورونو له مخې ایران په رسمي ډول د تفاهم له یاداشت (MOU) څخه وتلی دی او دې اقدام د تهران او واشنګټن ترمنځ تاوتریخوالی لا پسې زیات کړی دی.
د امریکا ولسمشر ډونالډ ټرمپ خبرداری ورکړی، چې د ایران د دریځ د نه بدلېدو په صورت کې به پوځي فشارونه زیات شي او د ایران پر مهمو اقتصادي او انرژۍ اړوندو تاسیساتو به نور بریدونه هم ترسره شي.
بل لور ته ایراني چارواکو تر اوسه د ټرمپ د دغو تازه څرګندونو په اړه رسمي غبرګون نه دی ښودلی، خو د دواړو هېوادونو ترمنځ د کړکېچ د پراخېدو په اړه اندېښنې زیاتې شوې دي.