رویټرز راپور ورکړی، چې د امریکا او ایران ترمنځ د خلیج د جګړې درولو لپاره یو تفاهم لیک ممکن راتلونکې یکشنبه لاسلیک شي او زیات احتمال دا دی چې جنیوا کې به لاسلیک شي.
سرچینې ویلي چې د تفاهم لیک متن لا هم نهایي کېږي او ایران پر خپل دریځ ټینګار کوي چې په دې تړون کې باید په لبنان کې جګړه هم پای ته ورسېږي.
بل لور ته د ايران ایرنا اژانس د ایران بهرنیو چارو وزارت ویاند له قوله ويلي، چې د جګړې د پای تفاهم لیک عمومي چوکاټ او متن تقریباً بشپړ شوی او د ایران د پرېکړه کوونکو بنسټونو وروستۍ پرېکړې ته په تمه دی.
د هغه په خبره د متن په محتوا کې ګڼ بدلونونه راغلي، خو اساسي جوړښت یې تر ډېره ثابت پاتې شوی دی.
د اټومي دوسیې په اړه هېڅ وروستۍ موافقه نه کېږي، ایران کوم نوی تعهد نه ورکوي؛ د ځینو رسنیو د ادعاوو خلاف، ایران په هیڅ ډول د هرمز تنګي د مدیریت سپارلو یا د امریکا او اسرائیلو تر پوځي بریدونو مخکې حالت ته د بېرته ستنېدو تعهد نه ورکوي او د تفاهم لیک په چوکاټ کې د ایران او امریکا ترمنځ د ۶۰ ورځنیو مذاکراتو پلان جوړ شوی، چې په دې موده کې به دواړه لوري د درېیو موضوعاتو په اړه خبرې کوي.
سرچينې ويلي د ایران سوله ییز اټومي پروګرام دوام، د امریکا د ټولو یو اړخیزو او “غیرقانوني” بندیزونو لرې کول او د جګړې له امله ایران ته د اوښتو زیانونو د جبران له میکانیزم پرته بله هیڅ موضوع به د مذاکراتو په اجنډا کې نه وي.