راپورونه وایي، چې د پاکستان تر کنټرول لاندې کشمیر کې نن پنجشنبه هم لاريونونه دوام لري، د راولاکوټ په سیمه کې نن سهار هم ډزې شوې دي او فضا خورا کړکېچنه ده.
ویل کېږي، چې د پاکستاني رژيم د پوځ او لاریونوالو ترمنځ په نښتو کې د وژل شویو شمېر ۱۵ کسانو ته رسېدلی دی.
دغه اعتراضونه چې لاریونوالو د خپلو سیاسي او ټولنیزو غوښتنو د مطرح کولو لپاره د روانې اونۍ په پیل کې شروع کړي، په تاوتریخوالي اوښتي او ګډونوال د حقونو، عدالت او ازادۍ غوښتنې مطرح کوي.
د لاریونو غوښتنه د «جمو او کشمیر جواینټ عوامي کمېټۍ سیاسي تنظیم» کړې ده، چې د حکومت له لخوا پرې بندیز لګول شوی او ۳۱ غړي یې هم نیول شوي دي.
د معلوماتو له مخې دغه لاریونونه ورو ورو په پراخېدو دي. احتجاج کوونکي وایي چې د خپلو حقونو تر منل کېدو پورې به احتجاج ته دوام ورکړي.
د کشمیر حکومت یې د ځپلو لپاره خپلې تاوتریخجنې هڅې پیل کړي. ویل کېږي چې د لاریونونو د کنټرول لپاره پر اعتراض کوونکو باندې مخامخ ډزې کېږي، هلته انټرنېټ، قطع شوی. لویې لارې، بازارونه او هټۍ تړل شوي او خلکو ته له کورونو د بېرون وتلو اجازه نه ورکول کېږي.
د بشري حقونو سازمانونو خبرداری ورکړی، چې د کشمیر حکومت دې د وضعیت د ارامولو لپاره له زور کارولو ډډه وکړي او د خبرو اترو له لارې ستونزې حل کړي.
دا په داسې حال کې ده، چې اوس مهال پاکستان تر بل هر وخت د سیاسي، امنیتي او اقتصادي ژور کړکېچ سره مخامخ دی.
بلخوا، پرون ورځ د پاکستان تر کنټرول لاندې کشمير په مظفر اباد کې د پوځ یوه الوتکه د تخنيکي ستونزې له امله نسکوره شوه.
په دې پېښه کې د الوتکې ټول پرسونل چې ۲۱ تنه وو، هلاک شوي. په هلاک شویو کې دوه پيلوټان، ۶ جګپوړي پوځي غړي او پاتې یې نظامي افسران او سرتیري وو.
دا په داسې حال کې ده، چې د کشمیر روان اعتراضونه د پاکستاني رسنیو د خبرونو برخه نه دي او پر رسنیو بندیز لګول شوی، چې د دغه لاریونونو د نشر څخه ډډه وکړي.