هېواد کې د اسلامي امارت له واک ته رسېدو وروسته، په لومړي ځل نن د ازبکستان هېواد لومړی وزير عبدالله عارف اُف افغانستان ته راغی، او نن یې د ریاست الوزرا اقتصادي مرستیال ملا عبدالغني برادر اخوند په شتون کې د دواړو هېوادونو ترمنځ د سوداګرۍ او پانګونې پنځه ستر تړونونه لاسلیک کړل.
د صنعت او سوداګرۍ وزارت په خپره شوې خبرپاڼه کې خبر ورکوي چې دغه تړونونه د افغانستان د سوداګرۍ وزارت او د ازبکستان د پانګونې، صنایعو او سوداګرۍ وزارتونو ترمنځ د سوداګرۍ او پانګونې په برخه کې چمتو شوي دي.
په خبرپاڼه کې همدا رنګه راغلي چې په دې سربیره، د اسلامي امارت د کانونو، پټرولیم، کرنې، اوبولګولو او مالدارۍ، او مالیې وزارتونو او د ازبکستان د اړوندو وزارتونو ترمنځ هم د اقتصادي اړیکو د پراختیا او پیاوړتیا لپاره هوکړه لیکونه لاسلیک شول.
خبرپاڼه زياتوي چې په همدې مناسبت مراسمو کې د ازبکستان لومړي وزیر عبدالله عارف اُف په نړېوالو فورمونو کې د افغانستان د ملاتړ ټینګار کړی او وايي چې له افغانستان سره همکارۍ ته چمتو دی او په خبره یې، له اوسني حکومت سره له تعامل پرته لارې ناشونې دي.
د اقتصاد پوهانو په وينا دغه تړونونه د دواړو هېوادونو ترمنځ د اقتصادي همکارۍ نوي فرصتونه او پراخې لارې پرانیزي، چې د سیمه ییز اقتصادي پرمختګ او ثبات لپاره یوه مهمه لاسته راوړنه بلل کیږي.
