د ریاستالوزراء اقتصادي مرستیال ملا عبدالغني برادر په مشرۍ د اړوندو وزارتونو د مسئولینو په ګډون د ایکو سازمان د ۱۷مې سرمشریزې په څنډه کې د ازبکستان، ترکمنستان، قزاقستان او اذربایجان هېوادونو له مشرانو سره د مطرح شویو موضوعاتو د تعقیب په موخه غونډه وشوه.
اقتصادي معاونیت په یوه خبرپاڼه کې ویلي، په دې غونډه کې اړوندو وزارتونو او ادارو ته یو شمېر کارونه ور سپارل شوي او له هغوی څخه غوښتنه شوې، چې په ټاکلي وخت د ریاستالوزرا له اقتصادي معاونیت سره د چارو پرمختګ راپور شریک کړي.
د یادونې ده، چې د ایکو سازمان د ۱۷مې سرمشریزې په څنډه کې د ریاستالوزرا اقتصادي مرستیال له لوري د یو شمېر هېوادونو له مشرانو سره د جلا جلا لیدنو پرمهال د افغانستان او یادو هېوادونو ترمنځ سیاسي او اقتصادي اړیکې، سوداګري، ترانزیټ، ټرانسپورټ، اوسپنې پټلۍ، برېښنا، افغانانو ته د ویزو ورکړې، ګډې بانکي همکارۍ او ځینې نور موضوعات مطرح شوي وو.
