لیکوال: سائس سعیدي
د شر او فساد ډلو تل هڅه کړې چې د اسلامي امارت او افغان ملت تر منځ تفرقه واچوي او په دې لاره کې د ملت بېلابېلو طبقو له اسلامي امارت څخه د لیرې کولو په موخه په مختلفو چلونو لاس پورې کوي.
په دې ورځو کې د دغې ډلې کسانو د اسلامي امارت د مجاهدینو تر نامه لاندې په کابل ولایت کې له امنیتي محدودیتونو څخه په ناوړه ګټه اخیستنې سره د شیعه ګانو په مذهبي مراسمو کې د ګډوډی هڅه وکړه چې د ورانۍ کولو او د حسینیه بیرغونو د ښکته کولو پر مهال د امنیتي ځواکونو له خوا ونیول شول.
مهمه خبره دا ده چې د باغیانو د جبهې مشرانو د تمساح اوښکې تویولې، د بیانونو په خپرولو سره یې د شیعه ګانو د بیرغونو ښکته کول په کلکه غندل او یو غیر انساني او دیني عمل یې بله، په داسې حال کې چې دا کار د دې فاسدو جبهاتو د غړو لخوا تر سره شوی دی، او هغه داسې چې د کابل ښار د مجاهدینو تر نامه لاندې د ملت او دولت تر منځ د تفرقې د رامنځته کولو په موخه یې دا هڅه کړې ده.
دا دسیسه د هغو شر او فشاد ډلو د سختې سستۍ او ګډوډۍ ښکارندويي کوي، چې د اسلامي امارت له وسله وال پوځ سره د مقابلې توان نه لري او په خم خم تللو د شیعه ګانو بیرغونه راکښته کوي او له منځه یې وړي.
په دې کار سره د شیعه ګانو په وړاندې د بغاوتګرانو ناوړه څېره نوره هم څرګنده شوه، چې دغه جنګسالاران د ولس د وینو په څښلو او د رعب او وحشت په رامنځته کولو سره د عسکرو د استخدام او د ځان لپاره د مال د راټولولو په لټه کې دي؛ له دې څخه وروسته افغان ولس او د په ځانګړې توګه شیعه ګان به د افغان ځواکونو سره اوږه په اوږه ودریږي او هیچا ته به اجازه ورنکړي چې مذهبي مراسم ګډوډ کړي.
هغه کسان چې څو ورځې وړاندې یې د غندنې څرګندونې وکړې ځکه داسې ښکاري چې اسلامي امارت د شیعه ګانو پر مراسمو بندیزونه لګولي دي، اوس چې دا کسان نیول شوي، باید په حقیقت پوه شي.
په حقیقت کې، د حکومت لخوا دا بندیزونه ریښتیا نه دي؛ بلکې د شر او فساد د جبهې خلکو دا ډول کړنې د حکومت او ملت تر منځ د شک او شبهې د رامنځته کولو په موخه تر سره کړي او نن باید د هغو کسانو چوپتیا ماته شي چې تقبیحي بیانونه یې صادر کړي او د دغو بدمرغه ډلو د تفرقه اچوونکو کړنې باید په کلکه وغندي.