د بښنې نړیوال سازمان په خپل نوي څېړنیز راپور کې ویلي، چې د ۱۴۰۴ کال د کب په ۲۶مه د کابل د روږدو د درملنې پر «امید» مرکز د پاکستان د پوځ خونړي هوايي بریدونه باید د احتمالي جنګي جرم په توګه وڅېړل شي.
دغه سازمان په خپل راپور کې ویلي، چې په دغه برید کې لږ تر لږه ۲۶۹ ملکي وګړي «شهيدان» او ۱۲۲ نور ټپیان شول.
د بښنې نړیوال سازمان ټینګار کړی، چې د پاکستان د پوځ د هغو ادعاوو د تایید لپاره هېڅ ډول شواهد نشته چې ګواکې له دغه مرکز څخه د وسلو او مهماتو د زېرمې یا نورو پوځي موخو لپاره ګټه اخیستل کېده.
د پاکستاني رژيم له لوري د روږدو د درملنې پر مرکز برید تر دې مهاله له ګڼو نړيوالو غبرګونونو سره مخ دی، او د افغانستان په خاوره د ښکاره تېري او وحشت بېلګه بلل کېږي.