د جمهوریت پر مهال د دفاع وزارت مرستیال تمیم عاصي، د مقاومت جبهې او نورو ډلو ټپلو له لوري د پاکستان پر ملاتړ دریځ نیولو ته توند غبرګون ښودلی او په وینا یې د ای اېس ای د نفوذ شبکه، د دوو رسنیزو بنسټونو له لارې په بې ساري ډول د کسانو په جذبولو بوخته ده او دا لړۍ ورځ تر بلې پراخېږي.
نوموړي ویلي، چې دا جذب، په ځانګړي ډول د پخوانیو پوځيانو او د جمهوري نظام د چارواکو ترمنځ، د شرم او تاریخي بدنامۍ خبره ده؛ داسې داغ چې کلونه به مو پر لمن پاتې وي.
هغه زیاته کړې «د څو زرو ډالرو، کور، موټر او د پاکستان په ښارونو کې د دفترونو په بدل کې، په خدای که دا سپکاوی او ذلت دومره ارزښت ولري. لږ تر لږه له خپلو هغو پخوانیو همسنګرو شرم وکړئ چې کلونه مو د پنجاب د دښمنۍ په نوم جګړو ته استول.»
د تمیم عاصي په وینا، تل یې سپارښتنه کړې چې هېڅکله د استخباراتي کار په ډګر کې مه ننوځئ او که ننوتئ، نو د خپل هېواد لپاره یې وکړئ. د پردیو لپاره به له تاسو د سون لرګيو پرته بل څه جوړ نه شئ.
هغه مقاومت جبهې ته په اشارې زیاته کړې، نن چې د همدې ډلې له خوا د پاکستان د بریدونو او لاسوهنو د توجیه او سپینولو لپاره پرلهپسې اعلامیې لولي، نو په خبره یې رښتیا هم انسان د ځینو دغو کسانو له ملګرتیا او پېژندګلوۍ پښېمانه او خواشینی کېږي.
هغه ټینګار کړی، چې له «طالبانو» سره مخالفت هېڅکله دا توجیه نه شي کېدای چې څوک د پاکستان د اجیر پوځ د بریدونو او عامه وژنو ملاتړ یا سپیناوی وکړي او سپارښتنه یې کړې چې غلام ابن غلام مه جوړېږئ.
نوموړي په پای کې ویلي، چې هر افغان چې حتی یوه ورځ یې د دې هېواد اوبه او ډوډۍ خوړلې وي، هېڅکله به د پاکستان ناولې لوبې او په افغانستان کې یې بریدونه توجیه او سپین نه کړي.