اکسيوس خبري وېبپاڼې د یوه امریکايي چارواکي له قوله ویلي چې د سپینې ماڼۍ ځانګړی استازی، سټیو ویټکاف، سویس ته په لاره دی؛ هغه هېواد چې تمه کېږي د ایران د اټومي پروګرام په اړه د احتمالي هوکړې لپاره د تهران او واشنګټن ترمنځ د خبرو اترو لومړی پړاو پکې ترسره شي.
په ورته مهال ایراني رسنیو هم راپور ورکړی چې د بهرنیو چارو وزیر عباس عراقچي هم د یادو خبرو لپاره سویس ته روان شوی.
د دغه چارواکي په وینا، جېرډ کوشنر، چې د ډونالډ ټرمپ زوم او استازی هم دی، دا مهال په سویس کې حضور لري. ټاکل شوې وه چې دغه خبرې پرون د سویس په بورګناشتوک سیمه کې پیل شي، خو په لبنان کې د اسراییل او حزبالله ترمنځ د نښتو له امله وځنډول شوې.
تر اوسه څرګنده نه ده، چې د دغو خبرو لپاره نوې نېټه ټاکل شوې ده که نه خو بل لور ته، د قطر لومړي وزیر او د امریکا او ایران ترمنځ یو له مهمو منځګړو څخه، محمد بن عبدالرحمن آل ثاني، هم د جمعې په ورځ سویس ته رسېدلی دی.
ټاکل شوې وه، چې د امریکا د ولسمشر مرستیال، جيډي ونس، د امریکایي پلاوي مشري وکړي، خو نوموړي د پنجشنبې په شپه خپل سفر په وروستیو شېبو کې وځنډاوه.