د ریاستالوزراء اقتصادي مرستیال، ملا عبدالغني برادر له لوري نن (پنجشنبه) بلخ ولایت کې د حیرتان-مزارشریف اوسپنې پټلۍ پنځمه برخه بیاځلي فعاله او پرانیستل شوه.
ښاغلي برادر په همدې مناسبت جوړو شویو مراسمو ته وینا کې ویلي، هېواد کې د اوسپنې پټلۍ شبکو د پراختیا په برخه کې د ټولګټو وزارت هڅې او د ازبکستان همکارۍ ستایلې دي.
هغه زیاته کړې، چې د افغانستان او ازبکستان ترمنځ اقتصادي او سوداګریزې اړیکې د پخوا په پرتله پياوړې شوې او د لا پراختیا لپاره یې ګډه کمېټه ټاکل شوې ده.
د اقتصادي معاونیت د خبرپاڼې له مخې، حیرتان-مزارشریف اوسپنې پټلۍ پنځمه برخه ۷۰ کیلومتره اوږدوالی، ۳۰ کیلومتره فرعي کرښې، پنځه سټېشنونه او همدارنګه د ۵۰ واګونونو د تخلیې ظرفیت لري.
د دې برخې په فعالېدو سره به د سوداګریزو توکو د حجم په زیاتوالي او انتقال کې د پام وړ سهولتونه رامنځته شي.