د خیبر پښتونخوا وزیر اعلی سهیل افریدي رسنیو ته په خبرو کې ویلي، چې د پاکستان تحریک انصاف کارکوونکي اوږدمهاله لاریونونو ته چمتو دي او تر هغې به خپلو لاریونونو ته دوام ورکړي، څو یې غوښتنې نه وي منل شوي.
سهیل افریدي ادعا کړې، چې د اکتوبر پر څلورمه به دومره خلک لاریونونو ته راووځي چې د پاکستان په تاریخ کې به یې ساری نه وي لیدل شوی.
نوموړي ویلي: «دا ځل د خلکو په سترګو کې چې کومه غوسه او کرکه لیدل کېږي، ما د خپل نږدې ۱۸ یا ۲۰ کلن سیاسي فعالیت په موده کې هېڅکله نه ده لیدلې.»
افریدي زیاته کړې چې د اکتوبر پر څلورمه راوتونکي لاریون کوونکي به د هېچا په کنټرول کې نه وي.