د ریاستالوزراء اقتصادي مرستیال ملا عبدالغني برادر اخوند د جبل السراج سمنټو د تولید د دویمې سترې فابریکې د جوړولو د پرانیستغونډې پر مهال وویل، چې دغه پروژه یوازې د یوې فابریکې د جوړولو طرحه نه ده، بلکې د افغانستان د صنعتي ودې، اقتصادي خپلواکۍ، کورني تولید د پیاوړتیا او راتلونکې سوکالۍ لپاره ستر ګام دی.
ملا برادر زیاته کړه، چې افغانستان د طبیعي زېرمو، بشري ظرفیتونو او مناسب جغرافیایي موقعیت له پلوه د صنعتي پرمختګ پراخ امکانات لري او اسلامي امارت دې برخې ته ځانګړې پاملرنه کړې ده.
نوموړي ټینګار وکړ، چې د ورته پروژو پلي کېدل به د هېواد د اقتصادي ودې، تولیداتو د زیاتوالي او ځانبساینې په برخه کې مهم رول ولري.