یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
کوم وخت چې اشغالګرې امریکا او متحدینو یې پر افغانستان ناروا یرغل وکړ، له ځان سره یې افغانستان ته د مفکرینو، سیاسیونو، روڼ آندو او… په نومونو داسې څهرې را پراشوټ کړې چې اکثره خو یې افغانانو په ځلونو استفراق کړې وې، د ملت د شړلو نتېجه دا وه چې ټولې نړۍ ترټلې وې.
ملت به یې ولې نه ترټي؟ خو نه یې اسلام او کفر معلومېده، افغانیت خو یې ځکه تر سوال لاندې وو چې د افغانستان د جغرافیې اړوند یې لا علم نه درلود، حال دا چې اقلا ګوګل خو یې باید سرچ کړی وای، د افغانستان اړوند معلومات ورته کېدل، خو له افغانستان سره طبعي نفرت یې اجازه نه ورکوله چې دومره لږ زحمت یې کښلی وای او دغه معلومات یې تر لاسه کړي وای.
او بل اسلامي شعائرو، دیني مقدساتو او اسلامي اقدارو سره یې نابلدتیا دومره څرګنده وه چې د هېواد ماشومان یې لا پر څرګندونو او کارنامو خاندې، د مثال په توګه ځینو به ویل: “افغانستان کې امریکایان شهیدان(؟) شول”.
ځینو به د امت په اسلافو لکه شیخ الاسلام ابن تیمیه رحمه الله تعالی و غیره، بالاخر د قرآنکریم په ایاتونو رشخند واهه او ځینو یې د جنازې په لمانځه کې رکوع کوله.
الغرض!
دومره لوی لوی مفکرین(؟) یې له ځان سره راته را وارد کړل چې د خپل فکر له مخې یې مقرره عبادتو کې ترمیم شروع کړ، ویل به یې: د ورځې مې مسجد حرام کې تهجد کاوه، په جنازه کې رکوع یې هم یو مثال بلل کېدای شي و غیره و غیره…له عباداتو سره یې نابلدتیا دومره علني وه، حتی خرم په خپل کتاب کې د نړۍ په کچه دوهم مفکر(؟) اړوند لیکي:”کله چې جمهوري ریاست ټاکنو ته کاندید کېده، په هغه ورځو کې یې لمونځ پیل کړ، د ماشومانو په شان به یې لمونځ کاوه، لکه ماشومان چې اول وار پر لمانځه ودرېږي، هاخوا دېخوا ګوري، مفکر صیب به هم هاخوا دېخوا کتل”.
امریکا له ځان سره هغه وطن فروشان، ضمیر فروشان، لوټماران او د طبعي زیرمو غله راوستل چې د ا.ا د وړاندینۍ واکمنۍ دمخه یې د افغانستان شتمني لوټ کړې وه، د هېواد ملي شتمني یې پر ګاونډیانو د متاع قلیل په عوض کې وپلورله.
دومره یې دې غلا ته مټي را بډ وهلې وې چې نوي ټانګونه او نور پوځي وسائط به یې ټوټې ټوټې کړل، کباړ به یې ترې جوړ کړ، همسایه ګانو باندې به یې پلورل، حالانکې د افغانستان شتمني د سرونو په بدل کې له یرغلګرو روسانو څخه ولجه شوې وه.
د دغو وطن فروشانو د خیانت او لوټمارۍ کیسې دومره دردوونکې دي، چې من حیث افغان یې اورېدل د هېڅ کس لپاره قابلِ برداشت نه دي.
لنډه دا چې: دغه لوټماران زموږ پر هېواد باندې دوه لسیزې مسلط شوي وو، چې څومره یې په توان کې وو، هغومره غلاوې، خیانتونه، ظلمونه یې وکړل؛ کله چې یې باداران زموږ له هېواد څخه وشړل شول، دوی هم د ګربۀِ مسکین په شان مړه غوږونه ورسره لاړل.
اوس تازه د ا.ا د بهرینو چارو وزیر ملت ته د حساب ورکولو پروګرام په څنډه کې د همغه شر خوښوونکو چې په بهرینو هېوادونو کې افغان سفارتخانو کې د جمهوریت مهال مېخ شوي وو، اړوند ویلي دي چې؛ لوټمارانو د سفارتونو د موټرانو خرڅولو سربېره د سفارتونو غالۍ/قالینې لا پلورلې دي.
ولې به داسې شرموونکې کړنې نه تر سره کوي، ځکه دوی له همدغه غلو، لوټمارانو، مفکرینو سره را لوی شوي او د دوی په تربیه، تربیه شوي دي، بلکې اکثره یې د دغه غلو ګټې پالونکي دي؛ غل خو به غل زېږوي، لکه چې شیخ سعدي رحمه الله تعالی فرمایي:”عاقبت ګرګ زاده ګرګ شود / ګر چه با ادمي بزرګ شود.
