د سي اېن اېن خبري شبکې ترکي څانګې خبر ورکړی چې د ترکیې د ولسمشرۍ د اړيکو د مرکز رئيس «فخرالدین التون» په خپلو ټولنيزو ادرسونو اعلان کړی چې د سوریې ولسمشر احمد الشرع به نن سه شنبه د فبروري په څلورمه د ترکیې د ولسمشر رجب طیب اردوغان په رسمي بلنه انقرې ته سفر وکړي.
التون زياته کړې چې د ښاغلي الشرع او اردوغان ترمنځ په ناستو کې به په سوریه کې د وروستيو پرمختګونو په اړه خبرې وشي او هغه ګډ اقدامات چې دواړه هېوادونه یې د اقتصاد، بیارغونې او په سوریه کې د تلپاتې ثبات راوستلو لپاره کولی شي وارزول شي.
د معلوماتو له مخې د ترکي او سوري چارواکو ترمنځ د خبرو يوه برخه په نړيوالو فورمونو کې د سوریې د انتقالي حکومت او د دې هیواد د خلکو لپاره د ممکنه ملاتړ په اړه راوڅرخي.
د ترکيې د ولسمشرۍ د اړيکو د مرکز رئيس ټینګار کړی، چې دا سفر به د ترکیې او سوریې په اړیکو کې یو مهم بدلون راولي او د دوه اړخیزو همکاریو په پراخولو کې به مرسته وکړي.
ترکيې ته د سوریې د ولسمشر احمد الشرع د سفر خبر داسې مهال خپرېږي، چې نوموړی تر دې وړاندې په دوه ورځني رسمي سفر سعودي عربستان ته تللی او ښايي له هغه ځايه ترکیې ته ولاړ شي.
