یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
الله تعالی چې ادم علیه السلام له اسمانونو ځمکې ته را ښکته کړ او شیطان یې د اولادې د بې لارۍ قسمونه وکړل، له هماغې ورځې د حق او باطل جګړه روانه ده.
په دې جګړه کې کفر تل د مؤمنو بنده ګانو په مخکې خنډونه او مشکلات جوړ کړې دي، وینې یې تویې کړي او بلاخره د اللهﷻ د قانون دښمني یې خپل لومړی کار او دنده ګڼلې ده، شپه او ورځ یې د مسلمانانو بربادولو او محکومولو ته کار ویلی دی.
خو د دوی سره ځینې د مسلمانانو په جامه کې ولاړ خلک هم د اسلامي امت د را پرځولو او محکومولو هڅې کوي، دوی په اسلامي امت کې درز اچولی چې له امله یې ویاړلی او په فطري ډول ازاد او خپلواک امت د ذلت په کندو کې په تیندکونو روان دی.
الله تعالیﷻ په قران پاک کې فرمایي: وَلَنْ تَرْضَى عَنْكَ الْيَهُودُ وَلَا النَّصَارَى حَتَّى تَتَّبِعَ مِلَّتَهُمْ [البقره سورة ۱۲۰ ایت].
ژباړه: ای پیغمبره! “هیڅکله” به درنه راضي نه شي یهود او نصاری تر هغو چې تاسې د دوی په ملت نه شئ.
علماء کرامو په خپلو تفاسیرو کې د دې آیت کریمه لاندې لیکلي: چې دلته الله تعالی د دین خبره نه کوي، بلکې فرمایي: (تتبع ملتهم) د “ملت” مفهوم له دین څخه ډېر لوی او پراخ دی، په ملت کې د یو چا فرهنګ، په ملت کې د یو چا ارزښتونه، په ملت کې د یو چا عقاید، په ملت کې د یو چا رسم و رواج ټول شامل دي.
تر څو چې د کفر ملت ونه منل شي، نو د هغوی رضایت له مسلمانانو بېخي ناممکن دی، او دا خبر په قران کریم کې الله تعالی په کراتو فرمایلې ده.
نن یو څو د شر او فساد لارویان د اسلام په جامه کې د کفر ملګرتیا کوي؛ خپل خلک او ولسونه د دوی(کفارو) په قالب کې ځایول او له سره ډیزاین کول غواړي.
دوی په دې خوشباورۍ کې لوېدلي چې ګوندې د مسلمانانو په ذلیله کولو کې به خپل هدف ته ورسېږي، خو دوی له ځان سره ښکاره ظلم او دوکه کوي، نن همدوی سره د خپل متزلزل ایمان کفار د ځان په خوا کې نه پرېږدي او هر یو د لاسي کاغذ په څېر له استعمال وروسته لرې غورځوي.
د شر او فساد ډله د اسلام او دین په ختمولو کې خپل ځانونه مسحه کوي، ځکه الله تبارک وتعالی د قران کریم په سورة الحجر کې فرمایي:”إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ” (سورة الحجر: 9).
ژباړه: بې شکه موږ قرآن نازل کړی دی او موږ به يې ساتنه کوو.
په دې آیت کې الله تعالی څرګندوي چې د قرآن او د دین ساتنه به(الله تعالیﷻ) خپله کوي او دا به له هر ډول تحریف او بدلون څخه تر قیامته خوندي ساتي.
نن د الله تعالی د قانون د ختمولو لپاره د شر او فساد ډله د علني کفر تر څنګ د مظلومو مسلمانانو پر خلاف سنګر نیولی او په دې باور خپله مردوده نظریه تطبیق کول غواړي چې د قیادت واګي به په لاس کې واخلي او کفر ته به بیا د تېر په څېر خدمت وکړي؛ خو دا یو خوب او خیال دی، د شر او فساد ډله په کراتو ازمایل شوې او د ولس لخوا استفراق شوې ده.
دوی به سره د خپلو ټولو شومو اهدافو شرمنده را وځي، ځکه چې دین د رجالو په له منځه وړلو کمزوری کېږي نه، بلکې لا قوي او غښتلی کېږي، په همدې بناء مؤمنان شهادت د ځان لپاره تر ټولو ستر اعزاز او سعادت ګڼي.
شریر او د غرب په بطن کې پراته بُغات دې د مؤمنانو له دښمنۍ او له علني کفر څخه لاسونه واخلي، ځکه چې دوی ته به د ځان او ملګرو د خوړولو پرته هیڅ په لاس ور نه شي.
