لیکوال: سرور فکرمند
احمد مسعود چې د نظار د شورا د چریکې قومندان احمدشاه مسعود زوی دی، چې پلار یې د اول مقاومت سرکرده وو او د طالبانو د تېر تحریک په وړاندې یې یوه نظامي ټلواله راجوړه او افغانستان ته یې د ناټو او امریکې د راتګ زمینه سازه کړله.
اوس یې زوی د ا.ا.ا په راتګ سره د بغاوت لاره خپله کړه، سره له دې چې د ا.ا مشرانو ورته فرصت ورکړ، مذاکرات یې ورسره وکړل، د امنیت تضمین یې ورته وکړ، د مسعود له استازو سره یې بار بار لیدنې وکړې خو د هغه ځواب رد و.
نوموړي کله د ټولشموله حکومت د جوړېدو شرط وړاندې کاوه او کله به یې انتخاباتي نظام د شرط په ډول رامخ ته کړ چې دغه شرایط یې هم د وخت په تېرېدو سره ممکن پوره شي، ځکه د ا.ا مشرانو ورته ویل چې؛ دا سرپرست حکومت دی او موږ عملا جګړه کې یو، لا خو تازه د ادارو په سمبالولو بوخت یو، د ادارو د رهبرۍ، د وطن د امنیت او خلکو ته د اقتصادي بحران څخه په نجات اخته یو چې په دې وطن کې امنیت او ډوډۍ اولیت دی، نور مسایل باید وخت ته پرېږدو.
خو مسعود د قدرت تندې دومره جنوني کړی و چې د ملت د امنیت او ډوډۍ پر ځای یې قدرت او چوکۍ غوښته.
اوس د امریکا کانګرس ته بلل شوی او هغوی ته یې ګیلې کړي چې موږ مو یوازې پرېښودو او دغه ناځواني باید زموږ په بې بریده ملاتړ جبران کړﺉ.
نوموړي ویلي چې موږ نظامي اقدام کوو تاسې پیسې او وسلې راکړﺉ، ترڅنګ یې استخباراتي همکارۍ راسره وکړﺉ.
جنګ د افغان وطن لپاره نه بدیل دی او نه د حل لاره، په جنګ کې ملت نور هم ورکېږي، ډوډۍ ترې اخیستل کېږي، امنیت یې له منځه ځي، خلک بې ابرو کېږي.
خو د جنګ د سرلارو او لارویو هیڅ هم نه ځي، بلکې هغوی د جنګ په اقتصاد تغذیه کېږي او جنګ د دوی یو ستر تجارت دی.
د دې لپاره چې د جنګ دا ناروا فتنه شنډه شي ملت او شته نظام باید ټول ملاحظات ختم کړي، ایجاد شوي درزونه باید پیوند شي څه باید نظام راښه شي او هم باید ملت راښه شي خپل توقعات راکم کړي او د نظام مجبوریتونه درک کړي، ترڅو موږ لومړیتوب اول وګڼو او نور شیان وروسته کړو.
لومړیتوب امنیت، ډوډۍ او کار دی چې دا کارونه د نظام په شتون او بدنه کې تامینیږي؛ بې نظامۍ هم امنیت تروړي، هم ډوډۍ حذف کېږي او کاري فرصتونه ختمیږي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.