یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د یو مؤمن قیادت او ملت پر وړاندې د نامشروع جګړې اور ته لمن وهل حرام عمل دی او لارویان یې د اسلام په رڼا کې باغیان بلل کېږي.
مونږ په دې لیکنه کې د تاریخ پاڼو او اوسني عصر حقایقو ته ځغلنده کتنه کوو، چې د دې ډلو مؤسیسین او لارویان د تاریخ په اوږدو کې څه ډول خلک وو او اوسني دعوه کوونکي او راپاتې نسل یې څه ډول دی؟د شر او فساد ډلو ټپلو مشران د تاریخ په پاڼو کې د غربي او شرقي تاړاک د نږدې مزدورانو په حیث پاتې شوي دي، چې راغلیو داړه مارانو ته یې تر ټولو ښه چوپړ کړی دی.
خپلې ملیشې یې د دوی په خدمت کې مؤظف کړې وې، د وحشي صفته شورویانو سره یې د سالنګ او ځینو نورو لویو لارو د امنیت ساتنې تړونونه امضاء کړې وه؛ چې دوی به ورته د لارو امنیت خوندي کاوه او هغوی به په بدل کې پیسې، وسلې او پښتون میشتې سیمي تر اور لاندې نیسي.
(د ۱۹۸۰م کال تړون)د شوروي ښکیلاک د ماتېده وروسته د خپل منځي جګړې پیل هم بیرته د شر او فساد لارویانو وکړ، چې له امله یې د کابل ښار په ګنډواله بدل شو او اویا زره/۷۰۰۰۰ بې ګناه افغانان پکې قتل عام شول.
د قومیت او سمتپالنې تر نامه لاندې یې جګړې پیل کړې؛ په ۲۰۰۱م کال کې چې امریکا او ملګرو یې په افغانستان یرغل کاوه، سمدلاسه د شر او فساد ډلې خپلې سیمې او ملیشې په واک کې ورکړې، هغوی په افغانستان کې په حاکم اسلامي امارت بریدونه پیل کړل، په زمیني جګړه کې له راغليو یرغلګرو مخکې همدا فسادیان روان وو.
په ۲۰۰۱م کال د نومبر په میاشت کې یې پنځه زره/۵۰۰۰ افغانان په ډلیېز ډول په شهادت ورسول او د دښتې لیلې په شګو او خاورو کې یې پټ کړل.
کله چې یې د جمهوریت په اډانه کې غوښنې وظیفې شوې، بیا یې د افغانانو د قتال لپاره د بلیک واټر، تریپل کینپي او نورو جنګي کمپنیو لپاره په ارزانه دنده ترسره کوله چې په ړندو بمباردیو، او چاپو کې یې عامه وژنه ښه په زور سره کوله.
نن هم هماغه د بلیک واټر او نورو جنګي کمپینو مزدوران راټول شوي او د خیالي جبهو په جوړولو یې د خپلو بادارانو په غېږ کې غوغا جوړه کړې ده چې ولې افغانانو سره بشري مرستې کېږي؟ ولې د افغانستان پر وړاندې جګړه نه کېږي؟دوی د خپلو پلرونو په څېر او حتی’ له هغوی هم ډېر بې رحمه او له وحشت ډک زړونه لري، چې د افغانانو په ډله ییزه وژنه هم نه دي یخ شوي.
د شر او فساد لارویان د الله تعالی له احکامو د سر غړاوي سره-سره له افغاني رسم او رواج هم بغاوت کوي، چې د افغانانو د وینې د زبېښلو لپاره هره لاره چاره لټوي.
دوی په افغانستان کې د غرب او نورو هر هغه هېواد لپاره تر ټولو ارزانه او ژر اماده کېدونکی مزدور پوځ دی.
په افغانستان کې د اسلامي امارت د بیا حاکمېدو را وروسته دوی خپل حیثیت بایللی دی، نه پرې داخل د هېواد کې څوک باور لري او نه په سیمه کې.
دوی ته فقط همدا ورپاتې دي، چې په میډیا کې په افغانانو پسې پروپاګند وکړي او ذهنونه یې مغشوش کړي، خو داسې ښکاري چې دا یې هم نور له وس وتلې ده.
ځکه په هېواد کې یې هم حیثیت صفر ضرب صفر دی او په نړیواله ټولنه کې هم د باور وړ پاتې نه دي، مجبور دي چې ځان ته په همدې راټولېدنو ډاډ ورکړي.
