کله چې پر افغانستان د غرب فرمایشي جمهوري نظام حاکم و، پردیو استخبارتي کړیو او ډلو فعالیت درلود، یوه یې هم اوسنۍ د شر او فساد مقاومت جبهه ده، دوی هغه مهال هم د ډالرو نشې اخیستي وو، اوس هم د شر او فساد تر عنوان لاندې را ټول شوي، د بهرنیو استخبارتو اهداف تطبیقوي او دا پاکه خاوره پلوري.
کله چې طالبان دوهم ځل د ۱۴۰۰ هـ ل کال، د اسد پر ۲۴مه پر کابل حاکم شول، شر او فساد ډلې له حاکم نظام څخه بغاوت اعلان کړ، د دغه جبهې پر مشر احمد مسعود ټول هغه شریر عناصر او فتنه ګر ور ټول دي، چې لاسونه یې د مظلومو افغانانو په وینو سره دي.
د دغه جبهې مشرانو په تېرو دریو کلنو کې له زیاتو فتنه ګرو سره راشه – درشه شروع کړې، تر څو د ډالرو په مقابل کې یو ځل بیا په افغانستان کې شر او فساد تقویه کړي، خو تر اوسه لا په فزیکي ډول نه دي توانېدلي چې خپل نامشروع اهداف ترلاسه کړي.
د شر او فساد لارویانو د هېواد د تجزیه طلبۍ په تکل، د پرځېدلي جمهوریت د حاکمیت پر مهال له افغاني هویت څخه انکار وکړ، دوی د (من افغان نیستم) شعار په بدرګه کولو لاریونونه وکړل او د تجزیې غوښتنې یې منعکسولې. اوس هم همدا خوبونه ویني او په تکل کې یې هڅې کوي.
په دې وروستیو کې چې کله د افغانستان او پاکستان اړیکې ترینګلې شوې، د شر او فساد ډلې له موقع څخه په استفاده، د تاجکستان په منځګړیتوب له پاکستان څخه د افغانستان په نیولو او د طالبانو ضد اکمال لپاره مرسته وغوښته. دا چې پاکستان د رسمي سرحد په توګه د ډیورنډ کرښې په رسمیت پیژندنې لپاره هر کله پر افغانستان فشار اچوي او نښتې رامنځته کوي؛ شر او فساد د ښه بدیل په توګه دغه کرښه د رسمي سرحد په توګه ومنل او بیا یې دا لویه جغرافیه وپلورل، تر څو د دوی ملاتړ وشي.
د شر او فساد ډلې د رهبرۍ غړي حفیظ منصور له یوې رسنۍ سره په خپله وروستۍ مرکه کې ډیورنډ کرښه د یوې نړۍوالې پولې په توګه ومنل او دغه سودا یې علني کړل. مګر دا چې افغان مؤمن او مجاهد ولس هر کله له اسلامي او ملي ارزښتونو او هېواد له ارضي تمامیت څخه دفاع کړې ده، هیڅکله به دغسې نا مشروع پریکړې ونه مني، بلکې د سر په قیمت به یې مخالفت کوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
