د مالیې وزیر، ملا محمد ناصر اخوند، ویلي چې د اسلامي امارت له لوري د مالیاتي اسانتیاوو او تخفیفونو لړۍ روانه ده او په راتلونکې کې به هم دوام ومومي.
هغه د مالیاتي تخفیفونو د اعلان په مراسمو کې وویل، که له کوم سوداګر یا بل وګړي څخه له قانون څخه زیاته مالیه اخیستل شوې وي، اړوند مسوولین به یې ځواب ویونکي وي. د نوموړي په وینا، د خلکو راټول شوي مالیات د هېواد د اړتیاوو او عامه ګټو لپاره مصرفېږي.
ملا محمد ناصر اخوند له خلکو وغوښتل چې د خپلو حقونو په اړه بېپروا نه شي او ویې ویل: «ملت دې یوه روپۍ هم را ونه بښي، که هغه بېځایه مصرفېږي.»
هغه زیاته کړې، چې افغان حکومت په تېرو پنځو کلونو کې په ۱۳ بېلابېلو برخو کې مالیاتي تخفیفونه عملي کړي او د اقتصادي فعالیتونو د ملاتړ لپاره به دا بهیر په راتلونکې کې هم دوام ولري.