د افغانستان د غالیو د تولیدوونکو او صادرونکو اتحادیې ويلي، چې په هېواد کې هره میاشت نږدې ۱۰ زره مربع متره غالۍ تولیدېږي چې لویه برخه یې بهرنیو بازارونو ته صادرېږي.
د يادې اتحاديې د مشر عبدالله رحمان قل په وینا، د هېواد په شمال کې د غالۍ اوبدلو صنعت شاوخوا ۱۵ زره کسانو ته د کار زمینه برابره کړې، چې ډېری یې ښځې دي.
رحمانقل زیاته کړه، افغاني غالۍ اوس مهال د نړۍ لږ تر لږه ۳۷ هېوادونو ته، په ځانګړي ډول ترکیې، اروپایي هېوادونو، امریکا، کاناډا او عربي هېوادونو ته صادرېږي او د لوړ کیفیت، اصیلو نقشو او طبیعي وړۍ له امله په نړۍوالو بازارونو کې ځانګړی ځای لري.