هر ملت داسې وختونه لري چې پکې د خلکو، سیاسي ډلو او اغېزناکو شخصیتونو اصلي دریځونه او موخې ښه څرګندېږي. د پاکستان له لوري د افغانستان د هوايي حریم پرله پسې نقض، د ملکي وګړو وژل، ټپي کول او وحشي بمبارۍ له هغو حساسو او برخلیک ټاکونکو پېښو څخه دي چې د هرې ډلې او هر افغان د ژمنتیا کچه په ډاګه کوي.
پاکستان څو ځله د افغانستان پر خاوره او ولس تېری کړی چې له امله یې بې ګناه افغانانو ته درانه ځاني او مالي زیانونه اوښتي دي. په داسې حالاتو کې د افغانستان ولس تمه لري چې ټول سیاسي او ټولنیز جریانونه د ډله ييزو او سیاسي محاسبو پر ځای د هېواد عزت، خپلواکۍ او عليا ګټې لومړیتوب وبولي.
د دغو بریدونو په غبرګون کې آن له لومړيو افغان حکومت د «ردالظلم» عملیات د یوه دفاعي او د ملکي افغانانو د غچ اخيستلو د اقدام په توګه ترسره کړل او ويې ښودله چې د افغان خاورې هوايي حريم نقض کول او د افغانانو وينه تويول به بې ځوابه نه پرېښودل کېږي، چې لا یې هم پاتې اقدامات تر لاس لاندې دي. دغه اقدام د ډېرو افغانانو په نظر د هېواد له حاکمیت د دفاع او ولس د غوښتنو پايله وه؛ خو له بلې خوا د پاکستان د بریدونو او د افغانستان د هوايي حریم د نقض په بېلابېلو مواردو کې د مخالفينو او ډلو خاموشي ټول ولس په غصه کړی.
د افغان ولس د مخالفو ډلو دغه چوپتیا او يا په يو شمېر مواردو کې برعکس د افغان حکومت په خلاف او د پاکستان د خوشحالولو لپاره د هغوی په ګټه تبصرې وکړې او پاکستان پلوه دريځونه یې ونيول. له پاکستان سره د دوی دوستي له همدې ځايه ښه څرګنده شوه، چې د مخالفت په عنوان یې حتی د پاکستان د غلامۍ داستان او ژورې اړیکې روښانه کړې. دوی همداراز وښوده چې دوی ته د افغانانو وينه بې ارزښته ده او يوازې د پرديو په جاسوسۍ کې شخصي مفادات او سياسي دښمنۍ ارزښت لري.
پاکستان ته د مخالفينو غلامي او نږدې اړيکې تاريخي ريښې لري، چې له احمد شاه مسعود څخه راشروع شوي. په ۱۳۷۱ هـ ل کال کې چې کابل د مجاهدينو لاس ته ولوېد، نو هغه وخت د پاکستان د استخباراتي شبکې (آی ايس آی) مشر حميد ګل له احمدشاه مسعود څخه د استخباراتي اسنادو غوښتنه کوي؛ دغه خبر فرنټير چې پاکستانۍ ورځپاڼه ده، په ۱۹۹۲ کال کې را اخيستی؛ چې جنرال حميد ګل د خاد د استخباراتي اسنادو د ترلاسه کولو په موخه کابل ته سفرونه کړي دي. په دغه ورځپاڼه کې راغلي چې: « حميدګل د پاکستان په اړه د خاد مدارک راټولوي» او ورسره زياتوي چې «احمد شاه مسعود اسناد جنرال حميدګل ته ور وسپارل.» له دې چارې د اوسنيو مخالفينو د اړیکو سوابق ښه ښکاري.
د احمدشاه مسعود پر فکر روان مخالفین پاکستان کې د آی ايس آی او د پاکستان د وحشي پوځ تر سيوري لاندي د افغانستان د بربادۍ خوبونه ويني؛ د پاکستان له دغو وحشي بمباريو څو ورځې وړاندې د آی ايس آی چارواکو د افغان حکومت د ځینو مخالفو ډلو مشرانو سره هم د پاکستان دننه او هم له پاکستان څخه بهر بېلابېلې غونډې او ناستې ترسره کړې. په دغو ناستو کې يې د افغانستان پر سر د معاملې، د افغان خاورې د ناامنه کولو او د افغانانو د وينې تویولو لپاره خپلې پخوانۍ ژمنې بيا تازه کړې.
د پاکستان د تېريو، بمباريو او ملکي افغانانو د وژنې پر وړاندې د مخالفو ډلو چوپتيا تصادفي نه ده، بلکې د هماغه اړيکو او ژمنو دوام دی چې ريښې يې له ډېر پخوا، بیا تر نن ورځې پورې غځېدلې دي. د دوی له ډلې د ځینو چوپتیا او د ځینو بیا پاکستان ته وفاداري به د ولس په ذهن کې د خیانت په توګه ثبت وي.
د مخالفو ډلو يوازينی هدف جعلي واک او پيسه ده، هغه که په هېواد کې زرګونه افغانان شهيدان کېږي، يا هم ټول هېواد ورانېږي، دوی ته توپیر نه لري. دوی تل همدا يو سياسي چلند خپل کړی چې د خپلو شومو مقاصدو لپاره د هېواد له برخليک سره لوبې کوي.
په ټوله کې دا روښانه ده چې د افغانستان د دښمنانو اصلي کړۍ د شعارونو، جعلي وفادارۍ او دروغجنو ادعاوو تر شا خپل پټ اهداف پر مخ وړي، خو د تاریخ له هر پړاو څخه دا ثابته شوې چې د ملت پر ضد معامله، د پردیو په غېږ کې ناستې او د هېوادوالو د وینو په بدل کې د واک لټون هېڅکله وطن دوستي نه ده.
افغان ولس نن تر بل هر وخت ښه پوه شوی چې څوک د هېواد د درد پر وخت چوپ او د پردیو د بمونو او پروژو تر سیوري لاندې د خپلې سیاسي سوداګرۍ حسابونه پالي. نو ځکه د دې خاورې د بچیانو دنده دا ده چې د هر ډول غلامۍ، فتنو او استخباراتي لوبو پر وړاندې یو موټی ودرېږي، د خپلو ارزښتونو او حاکمیت دفاع وکړي او هیڅکله نورو ته اجازه ورنه کړي چې د جعلي شعارونو په نوم د افغانستان برخلیک یو ځل بیا د پردیو لاس ته ولوېږي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.