د تبعید ټلواله په بهر کې د ملي مجمع په نامه؛ له یو ځای کېدو وړاندې د پاشل کېدو له نظرونو او فکرونو سره مخ وه، په دې مجمع کې راټول شوي زاړه او له کاره لوېدلې څهرې، یو او بل ته د کتلو سترګې نه لري. دوی یو او بل تر اولس په خپلو کې ښه سره پېژنې، د دوی خبرې او نظرونه د یو او بل په حق کې تش تورونه نه، بلکې تاريخي حقايق دي.
د نوې جوړې شوې مجمع غړي د جمهوریت پر مهال یو د بل رقیبان پاتې شوې دي، دوی په خپلو منځونو کې د قوم، قبيلو او سمتونو په اساس په سیمه ییزو دیکتاتورانو اوښتي وو او کلونه، کلونه یې یو د بل په راپرځولو پسې هڅې کولې. افغانان له دغه جنګ سالارانو بېزاره دي او دغه مفسدین د هېواد د ټولو بدبختیو عاملین ګڼي.
د دوی سیاست له دغه پرته بل څه نه شي کېدلی “چېرته چې ښه، هلته شپه”؛ نوموړي احزاب او بدنامې څهرې د خپلو ګټو پر محور له یو بل سره بیا، بیا دوستان او دښمنان شول او په ځلونو، ځلونو یې خپل سیاسي لید لوری بدل کړ.
د ژغورنې مجمع له جوړېدو وروسته د شر او فساد له جملې څخه تورن اسماعیل خان؛ ډېر ژر د مجمع په بل غړي حنیف اتمر باندې داسې تورونه پورې کړل، چې د ده په حق کې تر ډېره دروغ نه بلل کېږي. هغه وویل: اتمر تل یو ډېر فرېبکاره انسان و او یوازې یې د خپلو ګټو لپاره کار کاوه، حتی قومیت او ملت یې هم د خپلو شخصي ګټو لپاره استعمالول او په کنایوي ډول يې د اتمر پر وړاندې خپل پخوانی نظر هم څرګند او هغه يې د انګلستان اجنټ معرفي کړ.
دا او دې ته ورته مجلسونه ټلواله نه بلکه یوازې یوه آنلاین غونډه ده، چې نه یې عملي اغېز درلود، او نه به یې ولري. په دې زوم کال غونډه کې، اکثره د غونډې د غړو ترمنځ د عقدو او سیاسي اختلافاتو څرګندونې وشوې، دوی په ډېر ښکته موقف کې قرار لري، هېڅ نه پوهېږي چې له کومې حربې، حیلې او چل څخه کار واخلي، ترڅو خپل لوېدلی برم او عزت یو ځل بیا اعاده کړي.
د دوی سابقې ته په کتو د افغانانو تر منځ هېڅ مثبت نظر وړاندې نه شو، حتی B.B.C هم له منفي نظرونو څخه جوړ شوی یو اوږد او تفصيلي راپور ورباندې خپور کړ. په داسې حال کې چې د دوی له B.B.C څخه دا تمه نه وه؛ مګر لکه څنګه چې په افغاني ټولنه کې دوی رټل شوي او منفور ګرځېدلي دي، همداسې له هېواده بهر هم نور پردیو ته د کار وړ نه دي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.