خبر:
په افغانستان کې د ملګرو ملتونو مرستندویه ماموریت یا یوناما په تېرو دریو میاشتو کې په افغانستان کې د بشري حقونو د وضعیت په اړه د اووه مخیز راپور په خپرولو سره ويلي، چې په دغه هېواد کې تر ډېره بشري حقونه تر پښتو لاندې شوي دي؛ د راپور پر بنسټ، په افغانستان کې په جولای، اګسټ او سپټمبر میاشتو کې ۱۱۱ کسان د غلا، زنا، لواطت او نورو جرمونو له کبله په درو وهل شوي چې د دوی په وینا، دا له بشري حقونو سرغړونه ده.
راپور زیاتوي، په دغو دریو میاشتو کې د امر بالمعروف قانون د ښځو پر وړاندې ځینې پخواني محدودیتونه لا پسې سخت کړي او نوي محدودیتونه یې هم پرې ور زیات کړي دي.
یوناما ویلي، داسې پېښې یې هم ثبت کړي چې ښځې د محرم نه لرلو یا مناسب حجاب نه مراعتولو له امله بازار یا کارځای ته له تلو راګرځول شوې دي.
تبصره:
یوناما چې ادعا کوي، په افغانستان کې د ملګرو ملتونو د سازمان مرستندویه ماموریت دی، دا یې د تېرو دریو میاشتو راپور دی؛ د دې پر ځای چې یوناما د دغو کارونو ستاینه وکړي (ځکه د افغانستان د نافذه قوانینو په تطبیق سره په افغاني ټولنه کې جرمونه په چټکۍ سره د کمېدو لور ته روان دي) له بده مرغه دوی دا چاره له بشري حقونو سرغړونه بولي.
هر هېواد د خپلو دیني، دودیزو او مروجه ارزښتونو پر اساس ځان ته قوانین جوړوي، چې له همدې قوانینو بیا په ټولنې د نظم او امنیت د ټینګښت او د ژوند د چارو د تنظیم په موخه کار اخیستل کېږي؛ دا قوانین په شرقي ټولنو کې یو ډول او په غربي ټولنو کې بل ډول دي، چې هرې ټولنې د خپلو ارزښتونو پر اساس رامنځته کړي دي.
په امریکا کې یو ډول قوانین پلي کېږي، په چین کې بل ډول او په روسیه کې بل ډول، همدا ډول په ټوله نړۍ کې چې له دوو سوو ډېر هېوادونه دي، هر یو یې خپل قوانین لري او د هماغو په رڼا کې خپل ژوند او چارې پر مخ وړي، خو یوه ورځ نه پرې چا نیوکه وکړه او نه چا دا چاره له بشري حقونو سرغړونه وبلله.
افغانستان د یوه اسلامي هېواد په توګه چې له ۹۹ سلنه ډېر وګړي یې مسلمانان دي، خلک یې په ټولنه کې د اسلامي قوانینو د تطبیق سرسخته ملاتړي او غوښتونکي دي؛ که څه هم له کلونو راهیسې د نړۍ زبرځواکونو تل هڅه کړې چې پر دوی خپل قوانین او ارزښتونه وتپي، خو افغانانو یې تل مخالفت کړی او پر وړاندې یې درېدلي دي.
زموږ په ټولنه کې څو لسیزې وړاندې د کمونیستي ارزښتونو او قوانینو د پلي کېدو هڅه وشوه، چې له کبله یې زموږ په ټولنه کې سخت مخالفتونه راپورته شول، ستونزې او ننګونې یې راوټوکولې او زموږ د ټولنې توازن یې ګډوډ کړ، تر دې چې میلیونونو خلکو د خپلو سرونو په قربانۍ سره د هغو قوانینو د تطبیق مخه ونیوله او پر خپلو اسلامي ارزښتونو کلک ودرېدل.
بیا تېرې دوې لسیزې، امریکا، ناټو، اروپايي اتحاديې او د دوی ملاتړو هڅه وکړه چې د ټانګ، الوتکې، وسلې او توپ پر مټ زموږ پر ټولنه خپل ارزښتونه وتپي، خو د افغانانو له کلک غبرګون سره مخ شول، تر دې چې شل کاله یې مبارزه وکړه او بېرته یې داسې شرایط برابر کړل ترڅو په خپله ټولنه کې خپل اسلامي ارزښتونه تطبیق کړي.
زموږ دین د نړۍ تر ټولو غوره دین او قوانین یې تر ټولو عالي دي، چې د هر چا او هر ژوندي موجود ژوند او حقونه پکې خوندي دي، خو له بدغه مرغه د یوناما په څېر غربي ادارې او بنسټونه د خپلې هغې عُقدې له مخې چې زموږ له دین او ارزښتونو سره یې لري، تل دغه قوانین نقدوي او پرې نیوکې کوي.
یوناما او نوري غربي ادارې او بنسټونه دې یو ځل په پرانیستو سترګو د تېرو شلو کلونو د غربي ارزښتونو تطبیق ته متوجه شي چې زموږ ټولنه یې څومره وځپله، د ډيموکراسۍ مدعیانو د څومره بې ګناه خلکو وینې تویې کړې، زموږ په ټولنه کې یې څومره فساد خپور کړ، زموږ څومره ځوانان یې په نشو روږدي کړي، څومره نور یې په نورو بدمرغیو اخته کړل.
یوناما ته بویه چې خپله اصلي دنده وپېژني، دوی ولې پر امریکا، اروپا او نورو غربي هېوادونو نیوکې نه کوي چې په ټوله نړۍ کې یې د جګړې اور بل کړی او هره ورځ پکې زرګونه ماشومان، ښځې، سپین ږیږي او ځوانانو سوځول کېږي؟ دوی ولې غرب نه نقدوي چې بشریت یې مرګوني حالت ته رسولی؟ دوی ولې غربي ارزښتونه نه نقدوي چې غربي ټولنې یې همدا اوس د تباهۍ په څوکه درولي دي؟ دوی ولې غربي هېوادونه او بنسټونه نه نقدوي چې په ظالمانه توګه یې پر نورو بندیزونه لګولي دي؟
په افغانستان کې د اسلامي قوانینو تطبیق د ټولو افغانانو غوښتنه ده، اسلام یې دین او شریعت یې قانون دی؛ پر دغه قانون هر ډول نیوکه افغانانو ته سپکاوی او مردود کار دی، یوناما باید دغه ډول حساسیتونو ته سخت متوجه شي؛ همدا قوانین دي چې زموږ ټولنه یې روغه ساتلې او یوازې د دریو کلونو په اوږدو کې یې زموږ ټولنه د مرګ او تباهۍ له هغه مسیره راګرځولې چې تېرې دوې لسیزې غرب پرې روانه کړې وه.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
