د ایران صدا و سیما خبري اژانس خبر ورکړی، چې د امریکا د ولسمشر ډونالډ ټرمپ د لومړۍ دورې دفاع وزیر مارک اسپر ویلي، ایران په اوسنیو خبرو او سیمهییز وضعیت کې برلاسی دی.
اسپر د «ایبيسي نیوز» سره په مرکه کې ویلي، د هرمز تنګي د وضعیت او د ایران د شرطونو له مخې ښکاري، چې د دغه هېواد مشران په مذاکراتو کې پر خپل دریځ او فشار راوړونکو وسایلو باور لري.
هغه زیاته کړې، چې ایران فکر کوي چې د بریا په حالت کې دی او اوسنی وضعیت هم د همدې څرګندونه کوي او ویلې یې دي، چې ایران په سیمه کې د خپلو متحدو ډلو له لارې خپل نفوذ او ځواک ښيي او د پخوا په پرتله یې دریځ زړور شوی دی.
اسپر د امریکا د مهماتو کمښت ته هم اشاره کړې او ویلي یې دي، چې د ټرمپ اداره هڅه کوي د تولید په زیاتولو سره دا ستونزه راکمه کړي، خو ځینې وسلې لکه د پاتریوت توغندي جوړول ډېر وخت نیسي.