ليکوال: آصف قانوني
د امریکا له خوا په پېښور کې د خپلې قونسلګرۍ د تړلو پرېکړه يو اداري او د پيسو د سپما اقدام نه، بلکې په سیمه کې د پاکستان د امنیتي وضعیت د خورا خرابېدو یو پیاوړی او معنی لرونکی سیاسي پیغام دی. دا پرېکړه د لوېدیځو هېوادونو په ډیپلوماټیکو کړیو کې د پاکستان د ناامنه فضا په اړه د ژورې بې باورۍ څرګندونه کوي. کله چې داسې يو زبرځواک د پېښور په څېر د ستراتیژیک ښار امنیت د خپلو ډیپلوماتانو لپاره خوندي نه بولي، چې په دغه هېواد کې سیاسي نفوذ او نظامي حضور هم لري، نو دا په اتوماتیک ډول د ټول پاکستان د بې ثباتۍ په معنی ده.
د دې پرېکړې سیاسي تړاوونه تر ډېره د پاکستان د بهرني سیاست او داخلي امنیت تر منځ پر واټن ورڅرخي. د پاکستان حکومت تل هڅه کړې چې نړۍ ته د یو مسئول رژیم انځور وړاندې کړي، په ځانګړې توګه امريکا او غرب ته؛ خو په دغه خاوره کې د قونسلګریو نه خوندیتوب دا ادعا تر سوال لاندې راوستې ده. د امریکا دا ګام د پاکستان پر ادعاوو د عدم اعتماد مهر دی او ښیي چې پوځي رژیم نور نه د خپلو اتباعو او نه هم د بهرنیو ډیپلوماتانو د امنیت ساتلو وړتیا لري.
په عین حال کې، د پاکستاني طالبانو وروستي پرمختګونه او د پېښور ښار څو کیلومترۍ ته د هغوی نږدې کېدل، د پاکستان د پوځي ستراتیژۍ د ناکامۍ تر ټولو ستره بېلګه ده. په داسې حال کې چې د پاکستان پوځ د خپلو داخلي نیمګړتیاوو د پټولو لپاره پر افغانستان د بې بنسټه تورونو لګولو او نا مشروع بریدونو لړۍ پیل کړې، په خپله پېښور کې طالبان سړکونو ته راوتلي دي. دا تضاد د پاکستاني پوځ د خاصې شریرې کړۍ پر ټولو تبليغاتو د بطلان کرښه راوښکل او د ولس او نړۍ په وړاندې یې د دغه اجیرې کړۍ د عزت جنازه پورته کړه.
د پوځ پر خاصې کړۍ اوس د دغه هېواد دننه هم نیوکې زیاتې شوي چې څنګه د یو ګاونډي هېواد پر وړاندې د ټي ټي پي د پلمې په کارولو سره خپلې ناکامۍ پټوي، خو په حقیقت کې د دغه ډلې اصلي مرکزونه د ډیورنډ کرښې دې غاړې(پاکستان کې) د پوځي مرکزونو سره نږدې د فعالیت په حال کې دي. دا چې د پېښور په څېر یو لوی او تاریخي ښار ته نږدې د پوځ مخالفې وسلوالې ډلې دومره آزادانه تګ – راتګ کوي، په دې معنی ده چې د پاکستان امنیتي بنسټونه په کور دننه د دغو ډلو په کابو کولو کې پاتې راغلي.
دا وضعیت پاکستانی رژیم په نړیواله کچه د یو داسې پوځي رژیم په توګه انځوروي چې نه یوازې د خپلو ګاونډیانو لپاره ګواښ دی، بلکې د خپلو داخلي بحرانونو د مدیریت وړتیا هم نه لري. کله چې یو رژیم خپل ښارونه د وسلوالو له لوري د سقوط له خطر څخه نه شي ژغورلی، نو په طبیعي توګه د پانګونې، ډیپلوماسۍ او نړیوالو اړیکو لپاره د یوه بې باوره هېواد په توګه پېژندل کېږي. د نړۍ ستر قدرتونه اوس پاکستان ته د یوه داسې هېواد په سترګه ګوري چې د هېواد د ټولو حالاتو او بحرانونو کنټرول یې له لاسه وتلی دی.
د امریکا د قونسلګرۍ تړل د پاکستان د راتلونکي لپاره یو جدي خبرداری دی. که پاکستان د افغانستان پر وړاندې د سیاسي لوبو پر ځای د خپل کور د ابادولو او په کور دننه د امنیت لپاره عملي ګامونه پورته نه کړي، نو د پېښور په څېر د نورو سیمو د انزوا او د نړیوالو د لا زیاتې بې باورۍ احتمال شته. اوس د پاکستان لپاره د دروغجنو تبليغاتو او رواياتو وخت تېر شوی او په حقیقت کې د دغه هېواد د بقا لپاره د پوځي سیاستونو بنسټیز بدلون ته جدي اړتیا شته.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.