د پنجشیر ولایت مقام رسنيز دفتر، هندوکش غږ ته ويلي، چې د ياد ولايت سلګونه اوسېدونکو نن ورځ په دوو جلا غونډو کې د پاکستان له لوري پر پکتیا، پکتیکا او کونړ د هوايي بریدونو غندنه وکړه او هغه یې د اسلامي شریعت، بشري اصولو او نړیوالو قوانینو خلاف عمل وباله.
ګډونوالو ويلي، چې پاکستان باید د پخواني شوروي او امریکا له برخلیک څخه عبرت واخلي، ځکه په خبره یې افغانانو تل د خپل هېواد له خپلواکۍ دفاع کړې ده.
هغوی ټینګار کړی، چې د اړتیا په صورت کې به د اسلامي امارت له امنیتي او دفاعي ځواکونو سره اوږه په اوږه د هېواد دفاع وکړي.
ياده دې وي، چې د دغو بریدونو له امله ۳۶ ملکي وګړي، چې ښځې او ماشومان هم پکې شامل دي، شهیدان او ۱۶۳ نور ټپیان شوي دي.