د پنجشېر ولایت ځایي چارواکي وایي، چې د دې ولایت ۳۰ سلنه اوسېدونکي په مستقیم یا غیر مستقیم ډول د دغه ولایت د زمردو په استخراج کې پر کار بوخت دي.
د یاد ولایت د کانونو او پټرولیم رئیس محمد قاسم امیري ویلي، چې یوازې د حصه اول ولسوالۍ ۲۰ سلنه اوسېدونکي د زمردو د استخراج په برخه کې بوخت دي.
د نوموړي په خبره، د پنجشېر ولایت د نورو ولسواليو او حتی د ګاونډيو ولايتونو اوسېدونکي هم په دې پروسه کې فعاله ونډه لري.
ښاغلي امیري زیاته کړې، چې دوی تراوسه شاوخوا ۶۰۰ کسانو ته د ګران بیه او نیمه ګران بیه ډبرو د استخراج لپاره جوازونه ورکړي دي.