رویټرز خبر ورکړی، چې شمالي کوریا د ناټو له وروستۍ سرمشریزې وروسته پر امریکا او د هغوی پر متحدینو نیوکې کړي او ویلي یې دي، چې لوېدیځ هېوادونه د پوځي بلاکونو پیاوړتیا او د وسلو د زېرمو زیاتولو ته دوام ورکوي.
د شمالي کوریا د بهرنیو چارو وزارت په یوه اعلامیه کې، چې دولتي خبري اژانس (KCNA) خپره کړې، ویلي چې ناټو مشران د پیونګ یانګ د خپل حاکمیت د حقونو د کارولو اقدامات د ګواښ په توګه ښيي.
اعلامیه کې ناټو د جګړې او مقابلې پر لور د تلونکې ادارې په توګه یاده شوې او ټینګار شوی، چې شمالي کوریا به د خپل امنیت او حاکمیت د ساتنې لپاره خپل پوځي توان پیاوړی کړي.
دا څرګندونې وروسته له هغې کېږي، چې د ناټو په وروستۍ غونډه کې د پوځي همکاریو د پراختیا او د وسلو د تولید او پېرلو په اړه نوي تړونونه اعلان کړل. شمالي کوریا مخکې هم ویلي، چې د اټومي وسلو د پرېښودو غوښتنې یې پای ته رسېدلي او خپل اټومي ځواک به نور هم پیاوړی کړي.