انتونیو ګوترېش د ملګرو ملتونو عمومي منشي مصر ته د خپل سفر په ترڅ کې ویلي، چې په غزه کې د روانې جکړې په درولو کې دغه سازمان پاتې راغلی او توان یې نه لري.
منشي ګوترېش په مصر کې یوې خبرې ناستې ته خبرو کې په ډاګه کړې، هر هغه څوک چې د دغې جګړې د مهار کولو توان او طاقت په ځان کې ویني، لاس په کار دې شي او خپلې هڅې دې لا ګړندۍ کړي.
نوموړی چې مصر ته تللی، یو ځل بیا یې د ټولو بندیانو په خلاصون او د خپلواک فلسطین دولت په رامنځته کولو ټینګار کړی دی.
دوه ورځې وړاندې د چین او روسیې استازیو د ملګرو ملتونو په امنیت شورا کې د غزې د اوربند په اړه د امریکا هغه پرېکړه لیک ویټو کړ، چې په ریاکارانه ډول یې په کې د اوربند غوښتنه کړې وه او د اوکتوبر په ۷مه یې په اسراییلو د حماس بریدونه غندلي وو.
د اسراییلو له لوري د روانو بمباریو له امله غزه کې تر دې مهاله د ښځو او ماشومانو په ګډون تر ۳۲ زره زیات عام وګړي شهیدان شوي او تر ۷۳ زرو نور زیات ټپیان دي.
دې شخړې په غزه کې شدیده لوږه او قحطي هم رامنځته کړې ده.