د پوهنيز نظام د پراختيا او معياري کېدو په دوام د فارياب ولايت په پښتون کوټ ولسوالۍ کې د دوه لسيزو وروسته په لومړي ځل يو ښوونځی جوړ او ګټې اخيستنې ته وسپارل شول.
د فاریاب د پوهنې رییس، محمد طاهر جواد وايي، د دغه ښوونځي د ودانۍ پر جوړولو څه باندې ۱۶ میلیونه افغانۍ لګول شوي او دمګړۍ پکې شاوخوا ۵۰۰ زده کوونکي زده کړې کوي.
ښاغلی جواد زياتوي: په ياد ښوونځي ۱۶.۴ ميليونه افغانۍ لګښت راغلی چې د يوې معياري ودانۍ سربېره پکې کتابتون لابراتوار او کمپيوټر لب هم شتون لري او د اوبو یوه څاه هم پکې کیندل شوې ده.
په ياد ښوونځي کې ۲۶۰ زده کوونکي په یوه دوره کې او تر ۵۰۰ ډېر زده کوونکي په دوو دورو کې زده کړې کوي.
د پښتون کوټ ولسوالۍ یو شمېر اوسېدونکي وايي تر دې وړاندې د ښوونځي ودانۍ نشتون له امله د دوی ماشومان اړ وو چې لسګونه کيلومټره مزل وکړي او بلې ولسوالۍ ته د زده کړو لپاره لاړ شي؛ خو اوس یې په سلګونه ماشومان په اسانتيا سره زده کړو ته لاسرسی لري.
د فاریاب د پوهنې ریاست د معلوماتو پربنسټ په تېرو دوو میاشتو کې دغه ولایت کې د ۱۲ ښوونځیو د جوړولو کار پیل شوی دی او څلور نور ښوونځي هم ګټې اخیستنې ته سپارل شوي دي.
