د افغانستان لپاره د ایران ځانګړي استازي او سفیر حسن کاضمي قمي ویلي، چې له افغانستان سره پر پوله د دېوال جوړولو لومړنۍ طرحه بشپړه شوې ده.
نوموړي هغه له ایسنا خبري اژانس سره په مرکه کې ویلي چې د دېوال د جوړولو پرېکړه یوازې ایران ته د غیرقانوني کډوالو ننوتلو، انساني قاچاق مخنیوي او له نشه يي توکو سره د مبارزې لپاره نه، بلکې د ترهګریزو عناصرو د مهارولو لپاره پلې کېږي.هغه زیاته کړې، افغانستان او ایران د سرحدونو له وېشلو سره مخ نه دي، بلکې دوی د هغو ترهګریزو ډلو له ګواښ سره مخ دي چې د سترو قدرتونو له ملاتړه برخمنې دي.
قمي دغه راز د هلمند په سیند کې د حقابې د ورکړې په اړه هم هیله څرګنده کړې؛ خو دا یې هم ویلي دي چې له افغان چارواکو سره د دوی خبرو د پام وړ پایله نه ده ورکړې.
د افغانستان لپاره د ایران ځانګړی استازی په داسې حال کې یادې څرګندونې کوي چې څه موده وړاندې د سرپرست حکومت ویاند د ایران دې چارې ته په غبرګون کې ویلي وو چې له افغانستان سره په سرحداتو کې هر ډول اقدامات باید له سرپرست حکومت سره په تفاهم ترسره شي.
