د کډوالو او راستنېدونکو چارو وزارت وايي، نن او پرون له پاکستان او ایران څخه ۳ زره او ۴۷۹ افغان کډوال په جبري او خپله خوښه هېواد ته راستانه شوي دي.
له یاد وزارت څخه په خپره شوې خبرپاڼه کې ویل شوي، د هرات د اسلامکلا، د نیمروز د ورېښمو، د کندهار د سپینبولدک او د ننگرهار د تورخم فرضي کرښې له لارې څهباندې ۳ زره افغان کډوال راستانه شوي دي.: «د پورته ولایتونو له سرحدي امریتونو څخه د تر لاسه شیو معلوماتو له مخې په پاکستان کې مېشتې ۴۱کورنۍ چې ۲۰۸ تنه کېږي د تورخم فرضي کرښې له لارې او ۴۲ کورنۍ چې ۱۹۶ تنه کېږي د سپینبولدک له فرضي کرښې او په ایران کې مېشت دوه زره او ۳۸۵ تنه د هرات د اسلامکلا او ۶۹۰ تنه د نیمروز د ورېښمو له لارې څخه خپل هېواد ته راستانه شول.»
د خبرپاڼې له مخې، راستانه شوي افغان کډوال د نورو مرستو په موخه د ملگرو ملتونو عالي کمېشنرۍ، د کډوالو او خوړو نړیوال سازمان دفترونو ته ورپېژندل شوي او همدا راز د اسلامي امارت له کړنلارې سم ورسره مرسته شوې ده.
تېره اوونۍ د کډوالو او راستنېدونکو چارو چارسمبالي وزیر خلیل الرحمن حقاني د کار ملي کنفرانس کې ویلي وو، چې ټولو کډوالو ته ډاډ ورکوي چې له حقونو به یې دفاع کوي.:«د بېکارۍ عوامل باید په گوته او له منځه وړلو لپاره یې جدي کار وشي. اوس هم ځینې کړۍ هڅه کوي، چې افغانستان یو ځل بیا تېرو جګړو ته وگرځوي، له افغانستانه د اوزلوبې میدان جوړ کړي. موږ دا مهال پر یوې داسی کړنلارې او میکانېزم باندې کار روان کړی، څو بهرني مرسته کوونکو موسساتو ته قناعت ورکړو چې تر دې وروسته باید زموږ هېوادالو ته مرستې د کار په مقابل کې ورکړل شي.»
نوموړي له ټولو ادارو غوښتنه کړې وه، چې د راستنېدونکو کډوالو له مهارتونو څخه دې گټهواخیستل شي او د هغو چې زدهکړې نیمگړې پاتې دي باید په خصوصي او دولتي پوهنتونونو او ښوونځیو کې جذب شي.
