الجزیرې تازه راپور خپور کړی، چې له ۲۰۰۱ کال راهیسې د امریکا په مشرۍ جګړو او پوځي عملیاتو کې د مستقیمو او غیرمستقیمو مړینو شمېر له ۴.۵ تر ۴.۷ میلیونو کسانو پورې رسېدلی؛ په دې ډله کې شاوخوا ۹۴۰ زره کسان په مستقیمه جګړهییزه مرګژوبله او له ۳.۶ تر ۳.۸ میلیونو نور د جګړو د غیرمستقیمو اغېزو له امله وژل شوي دي.
الجزیرې د براون پوهنتون د «Costs of War» پروژې د شمېرو پر بنسټ راپور ورکړی، چې د غیرمستقیمو مړینو عمده لاملونه د جګړو له امله د اقتصاد او روغتیايي نظامونو ویجاړېدل، د بنسټونو له منځه تلل، ناروغۍ، خوارځواکي او نورې روغتیايي ستونزې دي. د راپور له مخې، افغانستان د مستقیمو جګړهییزو مړینو له پلوه ۱۷۶ زره، عراق ۳۱۵ زره، سوریه ۲۶۹ زره، یمن ۱۱۲ زره او پاکستان ۶۷ زره کسان له لاسه ورکړي دي.
راپور کې راځي، چې د دغو جګړو له امله په افغانستان، عراق، پاکستان، یمن، سومالیا، فلیپین، لیبیا او سوریه کې له ۳۸ میلیونو ډېر کسان بېځایه شوي دي.