یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
قرآن کریم د مسلمانانو لپاره د ژوند کتاب او اساسي قانون دی، د مسلمان ځانګړتیا دا ده چې د هرې ستونزې لپاره لومړی د حل لار د الله جل جلاله په کتاب کې و لټوي؛ څوک چې ځان مسلمان ګڼي مګر د قرآن په حکمونو باور نه لري، د مسلمانۍ ادعا یې بې بنسټه، د جزاء او مأخذې وړ دی.
د اسلامي امارت د نظام له راتګ سره د پخواني دولت ځینې هغه کسان چې د جګړو او ګډوډیو په تودولو کې یې ګټې وې، جیبونه او خزانې یې ترې ډکېدلې، اوس د غلا، لوټ او چور دروازه د هغوی په مخ تړل شوې ده.
دغه ظالمان چې د پخوانيو مقامونو د ترلاسه کولو هڅه کوي، د مقاومت یا دویم مقاومت په نامه یې یوه جبهه جوړه کړې، دوی لومړی مقاومت په احمد شاه مسعود پورې تړلی چې په ٢٠٠١ز کال کې ووژل شو.
په دې لیکنه کې د دې جبهې څرنګوالی د قرآن د څو آیتونو له مخې څېړو، تر څو زموږ مسلمانان د دې جبهې او د هغې له ملاتړو سره به مخ کېدلو کې په خپل اسلامي دریځ پوه شي.
دا څرګنده ده چې د مقاومت جبهې اوسنی مشر احمد مسعود د غربي بادارانو په لاس کې دی او دغه ډله د کفارو له لوري مالي مرسته ترلاسه کوي؛ حتی لومړي مقاومت هم د غرب او کفارو له مالي مرستې، شاباسي او ستاینې سره مقاومت کاوه؛ په دې اړه شواهد ډېر دي چې د مثال په توګه او د لنډون لپاره دلته دوه راپورونه وړاندې کوو:
١. د شفقنا افغانستان خبري اژانس د راپور له مخې اسرائیلي ورځپاڼې ماریف د ١٤٠٣ هجري شمسي کال په تله میاشت کې راپور ورکړی دی چې د مقاومت/بغاوت له مشر سره یې مرکه کړې، په دې مرکه کې احمد مسعود ویلي چې له طالبانو سره په جګړه کې د اسرائیلو په ګډون د هر هیواد د مرستې هرکلی کوي.
په دې راپور کې د احمد مسعود له قوله ویل شوي چې د مقاومت مشر له اسرائیلو سره د سیمه ییزې سولې په پلان کې همکارۍ ته تیار دی.
اسرائیل اوس مهال د اسلام تر ټولو لوی او بې رحمه دښمن دی، او دغه جبهه حتی د دوی لمنې ته هم لاس غځوي؛ که څه هم احمد مسعود د اسرائیلي ورځپاڼې ماریف راپور رد کړی او دروغ یې بللی؛ خو دا یې د خلکو د ذهنونو د مغشوش کولو او تېر ایستلو لپاره یوه هڅه ده، که نه د یوه هېواد ورځ پاڼه د یو بل هېواد د یوې راګیر ډلګۍ په اړه دروغجن راپور خپرلو ته اړتیا نه لري.
دا دویم مقاومت دی چې د لومړي مقاومت لار څاري؛ ځکه لومړی مقاومت هم د غرب او کفارو په ملاتړ مقاومت کاوه.
٢. د اسپکتیتر مجله د ٢٠٢٤ کال د مې میاشتې د ۱۸مې نیتې په شمېره کې لیکي چې امریکا په میاشتنۍ توګه ٤٠٠ زره پونډ احمد شاه مسعود ته د هغه تر قوماندې لاندې ځواکونو ته د روزنې لپاره لېږل.
اسپکتیتر همدارنګه لیکي چې پر امریکا سربېره، نورو غربي هیوادونو لکه فرانسې هم له احمد شاه مسعود سره د مجاهدینو او سرو لښکرو د جګړې په وخت کې مرسته کوله.
مګر دا چې ولې غربی هیوادونه او کافران له دې جبهې سره دومره لیوالتیا لري او مالي ملاتړ یې کوي، قرآن کریم په دې اړه ځواب ورکوي: الله تعالی د بقرې سورة به ۱۱۲ آیت کې وایي: «وَلَن تَرْضَىٰ عَنكَ ٱلۡيَهُودُ وَلَا ٱلنَّصَٰرَىٰ حَتَّىٰ تَتَّبِعَ مِلَّتَهُمۡۗ»، یعنې يهود او نصاری به هېڅکله له تا څخه راضي نه شي، تر څو چې د دوی د دین پیروي ونه کړې.
هو! ځکه چې مقاومت جبهې د یهودو او نصاراوو هدف مخ ته وړي، هغوی هم هر اړخیزې مرستې ورسره کوي.
الله تعالی د سورة ممتحنه په لومړي ایت کې وایي: «یَا أَیُّهَا الَّذِینَ آمَنُوا لَا تَتَّخِذُوا عَدُوِّی وَعَدُوَّکُمْ أَوْلِیَاءَ»، ای هغو کسانو چې ایمان مو راوړی! زما او ستاسې دښمنان (کافران) دوستان مه نیسئ.
او د ایت په پای کې وایي: «وَمَنْ یَفْعَلْهُ مِنْکُمْ فَقَدْ ضَلَّ سَوَاءَ السَّبِیلِ» او که څوک له تاسو څخه داسې وکړي، هغه له سمې لارې څخه ګمراه شوی دی.
پورتنی آیت په صراحت سره د بغاوت د جبهې د بې لارې توب او ګمراهۍ فتوی ورکوي، ځکه چې دوی له کافرانو سره دوستي لري او د هغوی له ملاتړ سره ژوند کوي.
الله تعالی د سورة بقرې په ۲۱۷ آیت کې د کافرانو په اړه وایي: «وَلَا يَزَالُونَ يُقَاتِلُونَكُمْ حَتَّى يَرُدُّوكُمْ عَنْ دِينِكُمْ إِنِ اسْتَطَاعُوا»، هغوی به تل له تاسو سره جګړه کوي تر څو چې وس یې ورسېږي تاسو له خپل دین څخه واړوي.
هو! د کفر نړۍ تل له اسلام سره په ټکر کې ده او هغه کسان چې له کفري نړۍ سره په څنګ کې دي او له هغوی سره نڅا کوي، د قاعدې له مخې (المرء مع من احب) د کافرانو له ډلې څخه دي او د هغوی موخې تعقیبوي.
الله تعالی د سورة النساء په ۱۳۸ ایت کې هغو مسلمانانو ته چې د غربی هیوادونو لمن یې نیولې، وایي: «الَّذِينَ يَتَّخِذُونَ الْكَافِرِينَ أَوْلِيَاءَ مِن دُونِ الْمُؤْمِنِينَ ۚ أَيَبْتَغُونَ عِندَهُمُ الْعِزَّةَ فَإِنَّ الْعِزَّةَ لِلَّهِ جَمِيعًا».ژباړه: هغه کسان چې کافران د مومنانو پر ځای دوستان ګڼي، آیا ریښتیا غواړي چې د دې دوستۍ له لارې د ځان لپاره عزت او ابرو پیدا کړي؟ حال دا چې ټول عزتونه الله تعالی لره دي.
اې هغو مقاومت کوونکو چې د اسلامي نظام به خلاف ولاړ یاست! د قرآن کریم هغه پیغام چې تاسې ورباندې باور لرئ، تاسې ته وړاندې شو؛ مخکې له دې چې ناوخته شي، راځئ د اسلامي نظام په غېږه کې، د هېواد د آبادۍ لپاره لاس په کار شئ.
ادامه لري…
