یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
دا معلومه خبره ده چې په افغانستان کې نږدئ یوه سلیزه کېږي چې مختلف حکومتونه راغلي او واپس له منځه تللي چې د هر یوه د زوال عوامل هم سره بېل دي، خو پر دې سربېره په افغانستان کې یو ډېر وړوکی اقلیت خلک شتون لري چې تل یې د افغانستان د مرکزي نظامونو پر وړاندې بغاوت کړی دی.
دا ډله خلک داسې معلومېږي چې یوه ارثي ناروغي لري د کومې له وجهې چې تل خپل اسلامي او ملي ارزښتونه تر پښو لاندې کوي او د پردیو جاسوسي او غلامي ته غاړه ږدي.
دا ډله خلک که څه هم ډېر کم او تر ډېره د یوې کورنۍ، یوې کوچنۍ علاقې او سیمې خلک دي خو دوی تل په یو نه یو ډول د افغانستان حکومتونو ته مزاحمت جوړ کړی وي، اګر که په حکومت کې ښه غوښنه برخه هم ورکړل شوې وي.
که بېخي لېري لاړ نه شو او په دې وروستیو شلو کلونو کې د افغان حکومتونو په وړاندې مزاحمت او بغاوت کوونکي را واخلو نو جوته به شي چې همدا کوچنوټې ډله چې په اصل کې د شر او فساد یوه خارج تمویله ډله ده؛ ټول تخریب کوونکي کارونه دوی ترسره کوي.
د اوسنۍ تش په نوم مقاومت جبهې غړي هغه څوک دي چې هیڅ ښه سابقه نه لري او دوی د خپلې هغې رواني ناروغۍ چې له کلونو کلونو د دوی په کورنۍ کې شتون لري په اساس نه یوازي د افغانستان اسلامې امارت بلکې د لاسپوڅې جمهوریت، چې دوی فعاله ونډه هم پکې لرله، په وړاندې هم مزاحمت جوړ کړی وو.
دوی پر دې سربېره چې د اسلامي نظام او قوانینو سرغړونه کوي، تل یې د خپل جمهوریت قوانین هم ننګول، د جمهوریت پښتون ټبره مشرانو ته یې توهین کاوه او د جمهوریت عسکر یې شکنجه کول.
په کرزي او غني به یې هغه فرمایشات منل چې یوازي د دوی خپل خواهشات وو او نور یې هیڅ ارزښت نه درلود او هغوی یې پر وړاندې هیڅ اقدام هم نشو کولای او نه یې دا صلاحیت درلود.
اوس که څوک اسلامي امارت له همدغه مقاومتیانو سره تعامل ته رابولي هغه په حقیقت کې یو ځل بیا افغانستان د سیاسي، امنیتي او نورو بې ثباتیو په لور سوق کوي، ځکه همدا مقاومتیان دي چې تل یې افغانستان بې ثباته او له پرمختګ ګوښه ساتلی وو.
