د هلمند د کرنې، اوبو لگولو او مالدارۍ ریاست وايي، په تېره یوه اوونۍ کې په دغه ولایت کې یې ۲۸۸۰جریبه دولتي ځمکه له غصب څخه راگرځولې او د غصب مخنیوی یې کړی دی.
له یاد ریاست څخه په خپره شوې خبرپاڼه کې ویل شوي، په هلمند کې ډېرې دولتي ځمکې په نوزاد، واشېر، گرمسېر، سنگین، باباجي او مارجې ولسوالیو کې له غصایبنو راگرځول شوي دي.:«په راگرځول شوو ځمکو کې دښتې، څړځایونه، ځنگلونه او غیر متصرفه ځمکې شاملې وې، چې د سیمهییزو خلکو له لوري په بېلابېلو نومونو غصب شوې وې.»
د خبرپاڼې له مخې، په یادو ځمکو کې لسګونه نوي جوړېدونکي کورونه او ژورې برمې هم له منځه وړل شوي، لسگونه وسایل یې نیول شوي او عاملین یې د اړوند ولسوالیو عدلي ـ قضايي ارگانونو ته سپارل شوي دي.
په خبرپاڼه کې ویل شوي، د دولتي ځمکو د بېرته راگرځولو په دغه کمپاین کې د کرنې ریاست سربېره امنیتي ادارې هم برخه اخلي.:«په هلمند کې د دولتي ځمکو د غصب مخنیوي کمپاین په ټولو ولسوالیو کې روان دی، چې هره ورځ په بېلابېلو ولسوالیو کې سلگونه جریبه ځمکو د غصب مخنیوی کېږي.»
عدلیې وزارت نږدې دوې اوونۍ وړاندې ویلي وو، په تېره یو میاشت کې یې د هېواد په ۲۱ ولایتونو کې څهباندې ۲۳۲زره جریبه حکومتي ځمکه تثبیت کړې ده.
یاد وزارت په خپل میاشتني راپور کې زیاته کړې وه، چې د ځمکو له غصب څخه د مخنیوي کمېسیون او تخنیکي پلاوو يې تېره یوه میاشت کې د هېواد په ۲۱ ولایتونو کې کابو ۲۳۲ زره او ۱۸۰ جریبه حکومتي ځمکه تثبیت کړې ده.
د عدلیې وزارت د معلوماتو پر بنسټ، تر اوسه یې د هېواد په بېلابېلو ولایتونو کې زرگونه جریبه ځمکه له غصب څخه راگرځولې او هغه ځمکې به هم بېرته راوگرځوي، چې له تېرو څو لسیزو راهیسې غصب شوې دي.
