د سیاست د لوبو ډګر دومره پراخ او وسیع دی چې انسان نه شي کولای حدود یې مالوم او یا وروستۍ پوله ورته وټاکي.
کله چې دا رنګارنګ سیاست د مبارزې، تقابل او سیالۍ ډګر ته راودانګي او د نورو هېوادونو پر ضد د یوې وسیلې په توګه وکارول شي، نو د دې لوبې بڼه بدلېږي او د فعالیت ساحه یې لا پراخېږي. په دغه سیاسي لوبه او د سیاست په جګړه ییز ډګر کې بېلابېل چلونه، دسیسې او فرېبونه کارول کېږي، اسلامي ارزښتونو، ټولنیزو او اخلاقي اصولو ته هېڅ پاملرنه نه په کې کېږي.
دا حقیقت له هیچا پټ نه دی چې له پاکستان سره ګاونډیتوب هېڅکله هم د افغانستان لپاره خیر او ښېګڼه نه ده درلودلې. دې هېواد تل هڅه کړې چې له افغانستان څخه یوازې خپلې یو اړخیزې ګټې خوندي کړي، تر هغه وخته چې د خپلو ګټو د خوندیتوب ډاډ ورسره و، د دوستۍ او مسکا څېره یې غوره کړې وه. خو کله یې چې خپلې ګټې له ګواښ او نابودۍ سره مخ لیدلې دي، سمدستي یې دسیسې او فریبکارۍ د دواړو هېوادونو د اړیکو او تعاملاتو ډګر ته راایستلې دي.
له هغه راهیسې چې په افغانستان کې اسلامي حاکمیت ټینګ شوی، د اسلام او اسلامي نظام بیرغ د دې هېواد پر هسکو څوکو رپېدلی، دې ځورېدلي هېواد د رښتینې خپلواکۍ او آزادۍ خوږ خوند څکلی، د آزاد ژوند معنی او مفهوم یې په عملي ډول درک کړی دی.
همدا رښتینې آزادي او خپلواکي هغه خوب دی چې پاکستان ترې وېره لري؛ دا چاره د افغانستان پر ضد د پاکستان پټې موخې او پټ خوبونه له ننګونو سره مخ کوي او د ناکامۍ پر لور یې بیایي.
که وګورو پاکستان په همدې لنډه موده کې څو ځله د افغانستان پر حریم وسلوال تېری کړی او د افغانستان بې ګناه ولس یې په وینو لړلی دی. دې نا اهله هېواد او ګاونډي په دې هم بسنه نه ده کړې، بلکې وخت ناوخت د خپلو پلورل شویو عناصرو او اجیرو کسانو په وسیله هڅه کوي چې افغانستان له دننه تخریب او د ناامنۍ لمن پکې پراخه کړي.
په همدې بنسټ، وخت په وخت داسې جبهې او ډلې راڅرګندېږي چې په بېلابېلو نومونو او نښانو ځانونه معرفي کوي او د رسنیو له لارې ظهور کوي. دغه ډلې د نورو هېوادونو له لوري د ټاکل شویو ناولیو موخو په عملي کولو سره هڅه کوي د خپل هېواد پاکه خاوره، بې ثباته او نا امنه کړي.
خو بیا هم په دې کې هېڅ شک نشته چې د اسلامي نظام تر واکمنۍ لاندې د افغانستان جغرافیه له فوق العاده او سراسري امنیت څخه برخمنه ده، د دې تبلیغاتي، تش په نوم جبهو او ډلو ټپلو راڅرګندېدل او ادعاوې نشي کولای دغه امنیت له جدي ګواښ سره مخ کړي.
خو اصلي خبره دا ده چې آیا دغه جبهې او ډلې رښتیا هم له داخل څخه تمویلېږي، که یې تګلاره او مسیر له بهره ورته ټاکل کېږي؟ له هېڅ عاقل انسان څخه پټه نه ده چې د دې جبهو مشران او لارښوونکي له پراخ او بې ساري ملاتړ څخه برخمن دي، دا ډول ملاتړ طبعاً د کوم ځواکمن هېواد یا اغېزمن لوري له خوا برابریږي؛ داسې هېواد چې هېڅ مالي محدودیت نه لري.
بل لوري ته هغه څه چې دې جبهو او ډلو په رسنیو کې نندارې ته وړاندې کړي او هغه ادعاوې چې دوی یې مطرح کوي، داسې انګیرل کېږي چې دوی له سوځېدلو مهرو او د میدان له داسې عادي سرتېرو پرته بل څه نه دي چې د نورو هېوادونو د پټو او ناوړه موخو د پلي کولو لپاره کار کوي.
دا خبره او انګېرنه د هرې داسې ډلې او جبهې تر شا پرته ده او هر بافکره او هوښیار انسان یې په اسانۍ درک کولای شي چې دا ادعاوې او شعارونه، له دسیسو او پټو موخو پرته بل څه نه دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.