د هندوکشغږ د تازه ترلاسه شوو معلوماتو په اساس نږدې دوه اونۍ وړاندې د بهر مېشتو مخالفينو يوې مطرحې څهرې پاکستان ته پټ سفر ترسره کړی و، په دې سفر کې د پاکستان د استخباراتو ادارې(آیایسآی) د مشر عاصم ملک په شمول د يو شمېر مهمو پاکستاني مسؤولينو او استخباراتي چارواکو سره ليدنې ترسره شوې وې.
د سرچينې د معلوماتو په اساس، په ياده ليدنه کې پاکستاني لوري محقق ته وړانديز کړی چې دوی حاضر دي په پاکستان کې د افغانستان په ضد د فعاليتونو لپاره هر ډول تسهيلات ورته برابر کړي، خو په دې شرط چې محمد محقق او په اصطلاح له ده سره د مقاومت شوری به د هغو اهدافو په ضد فعالیت کوي چې د پاکستان له لوري ورته په ګوته شوي دي.
په پاکستان کې د دفتر خلاصول، د محقق د ګوند غړو او ملګرو لپاره د ويزو او اقامو ورکړه او د په افغانستان کې د سرپرست حکومت په وړاندې د هر ډول سياسي او نظامي اقدام او فعاليت بشپړ ملاتړ کول د آیایسآی(ISI) له هغو مهمو وعدو څخه دي چې په دې ليدنه کې د محقق سره شوې دي.
په دې ليدنه کې له محقق څخه دا غوښتنه هم شوې چې په ايران کې د خپل نفوذ څخه په استفادې د آیاسآی د نظر وړ معلوماتو په راټولولو کې ورسره ګډ کار او همکاري وکړي؛ په خپله شخصا محقق په دې وختونو کې پاکستان ته ډير نږدې شوی دی او د ايران په ځای پاکستان ته زيات ميلان لري.
دا پټ او محرم سفر چې د مقاومت شوری د ځينو مهمو مسؤولينو په ناخبرتيا کې ترسره شوی دی، جزئيات يې لا تر اوسه هم د شوری سره نه دي شريک شوي، بلکې په محدوده کچه د يوې مشخصې حلقې سره شريک شوي او په اړه يې په همدې محدوده کړۍ کې سلا مشورې روانې دي، خو هندوکشغږ يې په اړه دقيق معلومات او پورته ذکر شوي جزئيات ترلاسه کړي دي.
د تحليلګرانو په وينا، په افغانستان کې د سرپرست حکومت بهر مېشتي مخالفين د غرب او سيمې د استخباراتي سازمانونو لپاره هغه ارزانه او آسانه عوامل دي چې کولای شي په آسانۍ يې د خپلو استخباراتي هدافو لپاره وکاروي او په ځينو هيوادونو کې پرې جاسوسي فعاليتونه ترسره کړي.
د يادونې وړ ده چې څه موده وړاندې هم د ځينو غربي استخباراتي سازمانونو له لوري په ترکيه کې د افغانستان د مخالفينو له ځينو مطرحو څهرو څخه په ايران او سيمه کې د استخباراتي معلوماتو د راټولولو په برخه کې د همکارۍ غوښتنه شوې وه.