پر غزه د اسرائیلو سخته بمباري لا هم روانه ده

د فلسطین د سرې میاشتې ټولنې ویلي، په رفح ښار د اسرائیلو له لوري سخته بمباري لا هم روانه ده، چې له امله یې گڼو ملکي خلکو ته پکې مرگ‌ژوبله اوښتې ده.د رفح ښار ځايي خلک وايي، د دغه ښار په شمال او مرکز کې د شپې په اوږدو کې اسرائیلو لسگونه هوايي بریدونه کړي، چې گڼ ملکیان یې پکې زیانمن کړي دي.د فلسطین د روغتیا وزارت ویلي، یوازې په بېگانیو بریدونو کې ۵۲ تنه وژل شوي، چې گڼ یې ماشومان او ښځې دي.تر دې مهاله د اسرائیلو په هوايي بریدونو کې د غزې ۲۸۱۰۰ تنه مړه شوي او ۶۷۵۰۰ تنه ټپیان شوي دي.د تېر اکټوبر میاشتې له اوومې راهیسې چې د حماس او اسرائیلو ترمنځ نښتې پیل شوي، رفح ښار ته ډېری خلک کوچېدلي دي او اوسمهال پکې یو نیم مېلیون انسانانو پناه اخیستې ده؛ خو اسرائیلو اوس پر دغه ښار خپله بمباري روانه ساتلې ده.په غزه کې د ملگرو ملتونو د بشري مرستو ادارې وايي، په غزه کې بشري ناورین دی او خلک یې اوس هېڅ خوندي پناه ځای نه لري.رفح ښار یوازې له مصر سره نښتې پوله لري، خو مصري حکومت هم دغه پوله د غزې خلکو پرمخ تړلې ده او مصر ته د ورتگ اجازه نه ورکوي.په غزه کې اوسمهال خوراکي توکي ختم شوي، خلک یې د څښاک اوبه نه لري، په روغتونونو کې درمل خلاص شوي او ډېری ټپیان د بې‌هوښۍ پرته عملیات کېږي.الجزیرې تلوېزن نن یوه داسې ویډیو خپره کړې، چې د غزې خلک هغه خواړه خوري چې مخکې یې خپلو څارویو ته ورکول.ملگري ملتونه، د بشري حقونو نړیواله اداره، سور صلیب، د اسلامي هېوادونو سازمان او ټوله نړۍ د غزې مظلومیت ته گوري، خو پر وړاندې یې کوم اقدام نه کوي.