د اوبو او برېښنا وزارت وايي، د کابل ښار په بېلابېلو سیمو کې د ځمکې لاندې د اوبو سرچینو د تغذیې په موخه یې څه باندې ۱۲۰۰ کړۍ څاهگانې کېندلې دي.یاد وزارت ویلي، د کابل ښار په بېلابېلو سیمو کې د اوبو په کاروونکو او سترو ګټو اخیستونکو باندې په ۱۴۰۲ کال کې ۱۲۲۰ کړۍ جذبې څاګانې د کابل ښار د ځمکې لاندې اوبو سرچینو -د تغذیې په موخه کېندلې دي: «څاهگانې د موسمي بارانونو د ورېدلو په صورت کې په یو کال کې نهه اویا زره، یو سلو اووه اویا اعشاریه نهه سوه پنځه شپېته( 79177،965 ) متر مکعب اوبو د ذخیره کولو وړتیا لري، چې د ځمکې لاندې پوړونو کې به زېرمه شي.»په سږني ژمي کې تر دې مهاله یوازې یو ځل د کابل پر ښار واوره ورېدلې ده. په هېواد کې د سختې وچکالۍ او اقلیمي بدلون له امله د کابل ښار د ځمکې لاندې اوبو سرچینې په کمېدو دي او اوبه لسگونه متره ښکته تللي دي.د اوبو چارو کارپوهان دغه چاره د اوبو په زېرمه کې اغېزمنه گڼي او له حکومت غوښتنه کوي چې د اوبو د زېرمه کولو څاهگانې دې د کابل په ټولو سیمو کې وکېندل شي، څو د واورې جذب کړي او د روانې وچکالۍ پر وړاندې ښه ثابت شي.
کابل کې د ځمکې لاندې د اوبو سرچینو د تغذیې په موخه ۱۲۰۰ څاهگانې کېندل شوي
#image_title