د پنجشیر د رسنیو دفتر په یوه خبرپاڼه کې ویلي، چې په دې ولایت کې د بیروج، زمرد او تورمالین ۴۲ نوي کانونه ثبت شوي او د قیمتي ډبرو د تثبیت شویو ساحو شمېر شاوخوا ۱۵۰۰ ته رسېدلی دی. همدارنګه د یوې تازه داوطلبۍ پر مهال ۶۷۵۵ قیراطه زمرد د ۱۴ میلیونه او ۴۵۳ زره او ۸۰۰ افغانیو په ارزښت پلورل شوي دي.
د خبرپانې ورکړل شویو معلوماتو له مخې، په پنجشیر کې د تثبیت شویو شاوخوا ۱۵۰۰ کانیزو ساحو په ډېری برخو کې د استخراج چارې روانې دي او د کانونو د فني استخراج د ښه والي اړینې هڅې هم دوام لري.
چارواکي زیاتوي، د قیمتي او نیمه قیمتي ډبرو د قانوني او شفاف پلور له امله د کورنیو او بهرنیو سوداګرو پانګونه ډېره شوې او په وروستۍ داوطلبۍ کې د کابل او یو شمېر ولایتونو ترڅنګ د کونړ سوداګرو هم د لومړي ځل لپاره ګډون کړی دی.