د مهاجرینو ستونزو ته د رسېدنې عالي کمېسیون دارالانشاء ویلي، چې د پنجشنبې په ورځ د ۱۴۰۵ کال د سرطان ۱۸مه، هېواد ته د راستنېدونکو افغان مهاجرینو د ثبت، لېږد، مالي مرستو، روغتیايي خدمتونو او عامه پوهاوي په برخو کې پراخ خدمات وړاندې شوي دي.
د راپور له مخې، په همدې ورځ د تورخم، سپین بولدک، اسلامکلا او بهرامچې له لارو ټولټال ۵۶۸ کورنۍ چې ۲۹۴۰ تنه غړي یې لرل، هېواد ته راستانه او ثبت شوې دي. همداراز ۶۰۹ کورنۍ له سرحدي سیمو څخه خپلو اصلي ولایتونو ته لېږدول شوي او د ترانسپورت لګښتونه هم ورته ورکړل شوي دي.
راپور زیاتوي، چې ۶۳۸ کورنیو ته نغدي مرستې وېشل شوي، سلګونه راستنېدونکو ته روغتیايي او مخابراتي خدمات وړاندې شوي او ۶۰۷ سیمکارتونه له فعالو بستو سره وېشل شوي دي.
دغه راز، د مهاجرینو د دایمي مېشتېدنې او ځمکو وېش کمېټې له لوري په ننګرهار، فراه، فاریاب او نیمروز ولایتونو کې ۶۱۸ راستنو شویو کورنیو ته د هستوګنیزو ځمکو نمرې وېشل شوي، چې ورسره د وېشل شوو نمرو ټولیز شمېر ۵۸ زره او ۳۴۸ ته رسېدلی دی.