د فلسطین روغتیا وزارت راپور ورکړی، چې د ۲۰۲۳ کال د اکتوبر میاشتې راهیسې د صهیونیستي رژیم لخوا غزه کې د پیل شوې جګړې له امله د شهیدانو شمېر ۷۳ زره او ۵۳ تنو ته لوړ شوی.
سرچینې زیاته کړې، چې دې موده کې ۱۷۳ زره او ۴۵۰ فلسطینیان ټپیان شوي هم دي.
د راپورونو له مخې، د ۲۰۲۵ کال د اکتوبر د ۱۱مې نېټې اوربند راهیسې د صهیونیستي رژیم له خوا ۱۰۴۱ تنه ملکي فلسطینیان شهیدان شوي او ۳۳۷۲ تنه ټپیان شوي دي.
راپور کاږي، چې په دې موده کې د ۷۸۶ شهیدانو جسدونه د نړېدلو ودانیو له خاورو څخه ترلاسه شوي دي.
له دې سره سم غزه کې د بشر حقونو مرکز ویلي، چې صهیونیستي رژیم پر بمبارد سربېره غزه کې له لوږې او تندې هم د فلسطینیانو د شکنجې لپاره کار اخلي.
په ورته مهال د غزې ناصر روغتون مسئولینو ویلي، چې په دغه تړانګه کې د میندو او ماشومانو خوارځواکي د ناورین تر کچې رسېدلې. دوی ویلي د روغتون په زېرمتون کې د نوو زیږیدلو ماشومانو لپاره شیدې هم نهلري.