په ملګرو ملتونو کې د چین ځانګړي استازي فو کانګ له امنیت شورا څخه غوښتي، چې د افغانستان د سرپرست حکومت د لوړپوړو چارواکو لپاره د سفر د بندیز معافیت په پام کې ونیسي.
نوموړي زیاته کړې، چې پر سرپرست حکومت لګول شوي بندیزونه دې تعدیل شي ترڅو د افغانستان له اوسني حکومت سره زیات تعامل ته زمینه برابره شي.
فو کانګ په خپله وینا کې ټینګار کړی، چې له افغانستان سره د بشري مرستو لړۍ باید دوام ومومي او دا مرستې باید د فشار د وسیلې په توګه ونه کارول شي.
د چین استازي د افغانستان کنګل شویو شتمنیو ته په اشارې سره ویلي، چې دغه شتمني د افغانانو حق ده او امریکا یې باید پرته له کوم شرط څخه ازاده کړي.
