سي بي اېس راپور ورکړی، چې امریکايي چارواکو ویلي چې د روانې جولای میاشتې له ۷مې نېټې راهیسې د ایران له لوري د امریکا پر پوځي اډو د بریدونو په ترڅ کې نږدې ۱۰۰ امریکايي سرتېري ژوبل شوي دي.
د امریکا د دفاع وزارت ویاند شان پارنل ویلي، د ټپیانو ډېری برخه له خفیفو مغزي ټپونو سره مخ شوې او شاوخوا ۹۶ سلنه یې بېرته خپلو دندو ته ستانه شوي دي.
د امریکا او ایران ترمنځ د متقابلو بریدونو لړۍ داسې مهال روانه ده چې واشنګټن وايي، هدف یې د هرمز تنګي په سیمه کې د ایران د بریدونو وړتیا کمول دي، خو تهران بیا د خلیجي هېوادونو په سیمه کې د امریکا پر پوځي اډو خپل بریدونه د ځوابي اقداماتو په توګه یادوي.
د راپورونو له مخې، په دغو بریدونو کې د ایران له لوري تر اوسه څلور امریکايي سرتېري وژل شوي هم دي.