د اسلامي امارت مرکزي وياند مولوي ذبيح الله مجاهد په يوه خپره کړې اعلاميه کې وايي چې ځانګړو ځواکونو په کابل او ننګرهار کې په جلا جلا عملياتو کې د فتنه ګرو د هغه ګروپ مهم غړي نیولي چې کابل کې یې د فرامینو او حکمونو د تعقیب او نظارت لوی ریاست پر کارکوونکو او په بامیانوکې یې پر خارجي سیلانیانو برید کې د لاس لرلو سربېره يو شمېر نور بريدونه هم کړي وو.
ښاغلی مجاهد زياتوي چې د دې برید د طراح او تنظیموونکي له پټنځای څخه یو کس تاجکستانی تبعه هم نیولی شوی چې غوښتل یې ځان وژونکی برید ترسره کړي.
د ښاغلي مجاهد پر خبره له پټنځای څخه یو انفجاري واسکټ، دوه میله وسله او مهمات هم ځانګړو ځواکونو ته په لاس ورغلي دي.
اعلاميه زياتوي چې په تحقیقاتو کې معلومه شوې چې د فرامینو او حکمونو د تعقیب او نظارت لوی ریاست پر کارکوونکو بریدګر د بلوچستان په مستونګ کې د داعش خراسان څانګې له روزنیز کمپ څخه افغانستان ته راغلی وو.
همدارنګه ښاغلی مجاهد وايي چې په دې وروستیو کې په هېواد کې د ځانګړو ځواکونو د بېلابېلو عملياتو په پايله کې نيول شوي داعشيان ډېری یې د پاکستان د بلوچستان په مستونګ سيمه کې روزل شوي، او همدا راز افغانستان کې له ځپلو وروسته هم يادې سيمې ته تښتېدلي دي.
