د ریاست الوزراء اقتصادي مرستیال ملا عبدالغني برادر اخوند په مشرۍ نن د مالیې، اوبو او انرژۍ وزارتونو، د افغانستان برېښنا شرکت او خصوصي سکتور ترمنځ د شاوخوا څلور مېلیارده افغانیو په ارزښت د څلورو پروژو تړونونه لاسلیک شول.
له اقتصادي معاونیت څخه په خپره شوې خبرپاڼه کې ویل شوي، د مالیې، اوبو او انرژۍ وزارتونو، د افغانستان برېښنا شرکت او خصوصي سکتور ترمنځ د شاوخوا څلور مېلیارده افغانیو په ارزښت د برېښنا د تولید او ساختماني چارو څلورو پروژو تړونونه لاسلیک شول.
دغه پروژې د کابل ولایت سروبي ولسوالۍ کې د شاوخوا ۲۳ مېگاواټه لمریزې برېښنا د تولید، د هرات په ولایت کې د دوه سب سټېشنونو جوړول او د ۲۲۰ کیلو ولټ برېښنا مزي غځول، کابل ښار کوټې سنگي ساحه کې د سوداگریز مارکېټ او هلمند کې د سوداگریز مرکز او استوگنې اپارتمانونو جوړول دي.: «پر دې پروژو شاوخوا څلور میلیارده افغانۍ پانګونه کیږي، چې په عملي کېدو سره به یې د هېواد د ملي عوایدو په کچه کې زیاتوالی راشي او سلگونو هېوادوالو ته به کاري فرصتونه برابر شي. د یادونې وړ ده، چې د پانگونې دغه پروژې د پانگونې بین الوزارتي کمېټې او اړوندو ادارو په هلو ځلو سره عملي بڼه پیدا کړې ده.»
د اوبو او انرژۍ چارسمبالي وزیر ملا عبداللطیف منصور د برېښنا د تولید او ودانیزو پروژو د تړونونو د لاسلیک په مراسمو کې وویل، چې اسلامي امارت د هېواد اقتصاد ته ځانگړې پاملرنه کړې، چې ښه بېلگه یې د اقتصادي معاونیت او د اقتصادي کمېسیون رامنځته کول د اسلامي امارت له لوري د هېواد اقتصاد ته د ځانگړې پاملرنې غوره بېلگې دي.
د چارو ادارې لوی رئیس نورالحق انور هم له ټولو پانگهوالو او سوداگرو وغوښتل چې په خپل کې پانگونه وکړي، ځکه اوسمهال په هېواد کې مالیات په ښه شکل لگول کېږي او د ضایع کېدو مخه یې نیول شوې ده.
د اقتصادي چارو کارپوهان دغه ډول پروژې د هېواد د اقتصادي وضعیت په ښه کېدو کې مهم گڼي له حکومت هیله کوي چې اوږدمهاله پروژې پیل کړي، چې هم به خلکو ته د کار زمینه برابره شي او هم به د هېواد اقتصادي وضعیت ورسره ښه شي.